Méxiku Avansa Ba Jornada 16 Hafoin Halakon Ekuadór 2-0

Raúl Jiménez hosi Méxiku selebra golu bainhira joga hasoru Ekuadór iha Kopa Mundiál 2026 iha estádiu Azteca-Méxiku. Imajen/EFE

Díli, 01 Jullu 2026 (RAFA.TL)- Selesaun Nasionál Futeból mexikanu asegura fatin ida iha Jornada 16 Kopa Mundiál 2026 hafoin halakon Ekuadór ho score 2-0 iha faze elimiatóriu ne’ebé hala’o iha Estádiu Azteca, Méxiku, Kuarta (01/07/2026).

Nasaun uma-na’in, Méxiku, halo jogu ida ho dominante hahú hosi inísiu jogu nian, hodi hola kedas inisiativa atake no presaun ba defeza Ekuadór nian.

Ho jogu ida ne’ebé iha intensidade maka’ás, ekipa uma-nain konsege domina pasajen sira no kontinua lansa atake ba adversáriu, maibé Ekuadór mantein disiplina no halo mós kontra atake liu husi oportunidade ne’ebé iha.

Golu dahuluk hosi Méxiku marka hosi Julian Quinones iha minutu 22 hafoin aproveita pasajen ida hosi Roberto Alvarado hodi muda score ba 1-0.

Golu ne’e hasa’e konfiansa uma-na’in nian; sira kontinua kontrola jogu no obriga adversáriu tenke halo esforsu estra hodi halo balansu ba jogu ho defeza ida metin.

Méxiku aumenta tan golu ida hodi muda score ba 2-0 iha minutu 31 liu husi avansadu Raul Jimenez hafoin simu pasajen ida ne’ebé loos hosi Julian Quinones hodi marka golu no Méxiku mantein lidera too primeira parte termina.

Tama ba segunda parte, Ekuadór tenta atu aumenta sira nia intensidade atake nian hodi duni tuir atrazu ne´ebé iha, maibé, defeza Méxiku nian metin no impede adversáriu nia tentativa oioin hodi marka golu.

Iha jogu, Méxiku kontinua domina jogu ne’e enkuantu Ekuadór konsege halo deit tentativa hitu.

Ho  dominasaun Méxiku nian mós obriga Ekuadór atu halo falta oioin hodi hapara sira nia adversáriu nia atake sira.

Iha jogu ne’e mós Árbitru fó kartaun kinur rua ba jogadór ekuadór sira molok ikus mai fó kartaun mean ida ba Paul Hincapie iha minutu 90+5.

To’o jogu termina, Score 2-0 la muda no vitória ba Méxiku. Rezultadu ida-ne’e asegura Méxiku nia fatin iha Jornada 16 Kopa Mundiál 2026, enkuantu kampaña Ekuadór nian remata iha Jornada 32.

Méxiku sei hasoru manan-na’in hosi jogu entre Inglaterra ho Repúblika Demokrátika Kongo, ne’ebé marka ona ba Kinta madrugada iha tuku 02:00 Otl.

Jornalista: David Gonçalves/Editór: Vito Salvadór