Noruega Avansa Ba Jornada 16 Hafoin Manán Kosta Marfim 2-1

Costa Marfim vs Noruega. Imajen/FIFA

Díli, 01 Jullu 2026 (RAFA.tl)- Ekipa Selesaun Nasionál Noruega avansa ba Jornada 16 hafoin halakon Kosta Marfin ho score 2-1 iha faze eliminasaun Kopa Mundiál 2026 ne’ebé halao iha Estádiu AT&T Arlington, Kuarta (01/07/2026).

Vitória ne’e Noruega asegura liu husi golu Antonio Nusa no Erling Haaland, enkuantu Kosta Marfim responde golu ida liu husi Jogadór Amad Diallo.

Desde inisiu jogu, Kosta Marfim kria oportunidade dahuluk liuhosi suta ida hosi Nicolas Pépé, maibé hetan impedimentu hosi defeza noruegés. Hafoin amiasa ne’e ekipa rua mantein sira nia ritmu jogu no hahu hasae ida-idak nia intensidade jogu hodi buka oportunidade atu marka golu.

Kosta Marfim kontinua halo tentativa oin-oin liu husi jogadór sira iha liña avansadu maibé defeza Noruega mantein jogu ho disiplina no halo balansu ba atake sira asegura baliza husi amiasa sira.

Noruega lidera iha minutu 39 bainhira esforsu individuál husi Antonio Nusa rezulta golu ida, no muda score ba 1-0. Hafoin golu ne´e, Ekipa Noruega kontinua lansa atake no iha oportunidade atu duplika sira nia vantajen liuhosi suta Erling Haaland nian, maibé bola lakona alvu.

Kosta Marfim hatán ho oportunidade ida hosi kabesa Emmanuel Agbadou nian, maibé nia esforsu ses dook hosi baliza noruegés ho nune´e ekipa rua mantein ho score iha tabele too intervallu.

Iha inísiu segunda parte, Kosta Marfim halo presaun ba Noruega hodi lansa atake no kria oportunidade liuhosi Pépé, maibé bola ne’e sei salva hosi guarda-rede noruegués Ørjan Nyland.

Kosta Marfim ikus mai halo empata iha minutu 74 hafoin asaun individuál hosi Amad Diallo remata ho golu ida, hodi muda score ba 1-1.

Iha minutu ikus jogu nian, Noruega hetan hikas vantajen bainhira pasajen ida hosi Patrick Berg konverte ba golu ida hosi Erling Haaland, halo 2-1 iha minutu 86.

Hafoin golu ne´e, jogu nia intensidade kontinua sae liutan, Kosta Marfim tenta pelumenus halo empata, maibé score 2-1 kontinua mantein ba Noruega to’o apitu finál.

Entertantu, iha Jornada 16, Noruega sei hasoru Brazíl iha Estádiu MetLife iha Nova Jersey, Segunda 06  Jullu 2026.

Jornalista: David Gonçalves/Editór: Vito Salvadór