Brazil Hakat Ba Jornada 16 Hafoin Halakon Ekipa Samurai Blue 2-1

Brazíl avansa ba jornada 16 hafoin halakon Japaun score 2-1, Tersa 30 Juñu 2026.

Díli, 30 Juñu 2026 (RAFA.TL)- Selesaun brazileiru asegura sira nia fatin iha jornada 16 Kopa Mundiál 2026 hafoin rekolla vitória importante hasoru adversáriu Japaun (ekipa Samurai Blue) ho score 2-1 iha Estádiu Houston, EUA, Tersa (30/06/2026).

Ekipa Samurai Blue ne’ebé iha ambisaun hakarak hakat ba faze tuir mai iha Kopa Mundiál 2026 halo jogu ida atrativu ho intensidade as kedas dezde primeira parte  hodi lansa kedas atake ba ekipa Brazil.

Japaun nia ambisaun ne’e lori dunik rezultadu iha minutu 29 liu husi jogadór Kaishu Sano ne’ebé ho esforsu koletiva ho nia ekipa. Médiu japonés halo dribling besik iha liña oin no tama ba área defeza adversáriu nian molok lansa sutu ida husi área penalidade nia li’ur ne’ebé halo baliza Brazil Alison Becker labele salva tan bola no golu ne’e lori Japaun lidera provizóriu ho score 1-0.

Japaun kontinua halo jogu ho defensivu maka’ás, maibé ekipa Samba kontinua halo esforsu no lansa kontra atake ba ekipa Samurai Blue no ekipa rua mantein ho score 1-0 too intervallu.

Iha inísiu segunda parte, treinadór Carlo Ancelotti halo kedas mudansa tátika, hodi hatama Endrick no troka Lucas Paqueta iha esforsu ida hodi hasa’e atake.

Ho mudansa ne’e, Brazíl besik atu halo empata iha minutu 51 liuhosi kabesa Danilo, maibé Zion Suzuki alerta tebes hodi baku bola sai.

Liutiha minutu ida, kabesa ida husi Bruno Guimaraes hetan blokeiu husi Takehiro Tomiyasu iha kedas baliza nia oin.

Presaun Brazil ikus mai hetan rezultadu iha minutu 54. Casemiro ho susesu hatama golu hafoin aproveita asistensia hosi Gabriel Magalhaes iha poste dook, hodi halo empata ba 1-1.

Brazil kontinua halo presaun hodi buka atu marka tan golu, no  Vinicius Junior kuaze atu marka golu, maibé suta ne’ebé nia lansa kona deit poste hafoin hetan salva hosi Suzuki. Japaun kontinua halo jogu ida ho disiplina, maibé kontra atake ne´ebé ekipa Samurai Blue lansa hetan blokeiu husi ekipa Brazil.

Golu vitória ekipa Brazil nian ikus mai hetan iha minutu 90+6 iha tempu estra segunda parte nian liu husi jogadór Gabriel Martinelli hafoin simu pasajen ida hosi Bruno Guimaraes iha área penalidade nia laran molok halakon Zion Suzuki hodi marka golu no muda score ba 2-1.

Ho rezultadu ne’e, Brazíl avansa ba jornada 16 hodi hasoru manan-na’in jogu entre Kosta Marfim no Noruega, enkuantu Japaun nian jornada iha Kopa Mundiál termina iha faze 32.

Jornalista: David Gonçalves/Editór: Vito Salvadór