Liga Timorense, Coração F.C Rekolla Vitória Dahuluk Hafoin Halakon AS Marca

Coração F.C vs AS Marca. Imajen/LFTL

Díli, 29 Juñu 2026 (RAFA.TL)- Ekipa Coração F.C rekolla vitória dahuluk iha Liga Futeból Timor-Leste (LFTL) Primera Divizaun jornada da-haat hafoin halakon nia adversáriu AS Marca ho score mihis 1-0.

Jogu entre ekipa rua ne´ebé halao iha Estádiu Munisipál Díli, Domingu (28/06/2026), ekipa Coração F.C hatudu kedas sira nia ambisaun iha minutu dahuluk hodi lansa kedas atake ba adversáriu.

Ekipa Coração F.C hasa’e kedas nia intensidade jogu, ho nune’e, tama ba iha minutu 17 ekipa Coração F.C konsege lidera uluk ho score 1-0 liu husi golu ne’ebé marka husi Jogadór Jeka Monteiro.

Ho score refere tensi jogu komesa manas ba ekipa rua ne’e hodi lansa kontra atake ba malu maibé esforsu no tentativa oioin ne´ebé kria husi ekipa rua seidauk bele muda score iha tabela no too jogu priemeira parte ekipa Coração F.C mantein lidera ho score 1-0.

Kontinua ba jogu segunda parte, ekipa rua nia jogu ho intensidade komesa manas liután,  hodi lansa kontra atake ba malu ho ritmu ida-idak nian no ekipa AS Marca ne´ebé mak sofre uluk ona golu ida desde Primera parte halo esforsu masimu hodi buka atu halo empata maibé esforsu la konsege sobu defeza hosi ekipa Coração F.C ne´ebé mak hatudu disiplina.

Ekipa Coração F.C kontinua domina bola hodi lansa presaun ba ekipa AS Marca husi liña ba liña ne’ebé kontrola di’ak, maibé defeza husi ekipa AS Marca kontinua solidu hodi la fó fatin ba ekipa Coração F.C atu marka tan golu ho nune´e to’o termina jogu segunda parte score 1-0 mantein la muda vitóri ba Coração FC.

Husi rezulatadu vitória ne’e lori ekipa Coração F.C sai ona husi zona degradasaun hodi okupa iha pozisaun ualu ho pontu tolu husi jogu haat, ho derrota dala-tolu no manan ida.

Enkuantu ekipa AS Marca tun ba pozisaun da-sia ho pontu rua husi jogu haat ne’ebé hala’o ona, ho rezultadu lakon dala-rua no empata rua.

Jornalista: Marito da Costa/Editór: Vito Salvadór