Kopa Mundiál 2026, Kroásia Halakon Nia Adversáriu Ghana 2-1

Jogadór sira Kroásia selebra golu hafoin manán Gana ho score 2-1. Imajen/Repro

Díli, 28 Juñu 2026 (RAFA.TL)- Kroásia susesu hakat ba faze 32 hafoin halakon nia adversáriu Ghana ho Score 2-1 iha jogu kontinuasaun Kopa Mundiál 2026 iha grupu L.

Jogu entre ekipa rua ne’ebé hala’o iha Estádiu Philadelpia, Domingu (28/06/2026), foin la’o minutu haat Kroasia halo kedas ameasa liuhusi Marin Pongracic nia kabesada  hafoin simu bola kruza husi Luca Modric, maibé bola sei liu de’it husi besi-rin leten.

Tama ba minutu 30 Kroásia kontinua lansa ameasa nafatin liuhusi bola kabesada Ivan Perisc iha grande área nia adversáriu Ghana, maibé bola sei bele defende husi guarda rede Ghana, Benjamin Asare.

Kroásia ikus mai konsege marka golu iha minute 31, liuhusi jogadór Peter Sucic  hodi muda score ba 1-0.

Derota golu ida, Ghana mós esforsu maka’ás hodi duni. Sira konsege hetan oportunidade di’ak iha minutu 40, liuhusi sutu maka’ás jogadór Antone Semenyo, maibé bola seidauk kona alvu. NUne’e score 1-0 mantein to’o intervallu.

Kontinu ba segunda parte, Ghana susesu halo empata ba score iha minutu 73 liu husi jogadór Ernest Nuamah nia kabesada hafoin simu bola husi Derrick Luckassen.

Ekipa rua hasa’e liután sira nia ritmu jogu, maibé bainhira tama ba minutu 83, Kroásia konsege lidera hikas ho score 2-1 ho Vlasic nia golu liuhusi kabesada hafoin simu bola kantu ne’ebé ezekuta husi sira Luka Modric.

Ekipa rua mantein halo kontra atake ba malu, maibé too jogu termina ekipa rua mantein ho score ne’ebé iha.

Ho rezultadu ida-ne’e, Kroásia termina faze apuramntu grupu L ho segunda klasifikasaun ho pontu 6. Enkuantu Ghana remata iha pozisaun datoluk ho pontu 4. Ekipa rua ne’e  avansa hotu ba faze 32.

Jornalista : Marito da Costa/Editór: Vito Salvadór