Liga Timorense, Emmanuel F.C Fahe Pontu Hanesan ho Aitana F.C

Emmanuel F.C vs Aitana F.C iha Liga Timorense Primeira Divizaun, Sábadu 27 Juñu 2026. Imajen/LFTL

Díli, 28 Juñu 2026 ( RAFA.TL)- Ekipa Emmanuel F.C ho nia adversáriu Aitana F.C rekolla pontu ida husi sira nia jogu hafoin ekipa rua mantein ho score 1-1 to’o jogu termina.

Jogu kontinuasaun Liga Timorense Primeira Divizaun, entre ekipa rua ne’ebé hala’o iha Estádiu Munisipál Díli,  Sábadu (27/06/2026), molok halo jogu jogadór hamutuk ho adeptu sira no ema hotu ne’ebé asiste jogu ekipa rua ne’e halo um minuto de silêncio hodi fó omenajen ba Saudozu eis-Prezidente Repúblika Francisco Guterres Lú-Olo.

Desde inisiu jogu primeira parte, ekipa rua halo kontra atake ba malu maka’ás, maibé Aitana F.C hetan uluk oportunidade di’ak iha minutu 18 liuhusi jogadór Denilson Ronsumbre nia suta maka’ás iha grande área hafoin simu bola husi nia kompatriota João Sequeira, mibé bola sei aas no la kona alvu.

Tama ba minutu 28, Emmanuel F.C mós koko halo ameasa ida liu husi jogadór Jonh Lawani halo kruza husi sorin no antisipa ho di’ak husi Jogadór Domingos Lopez no kontinua husik nia suta, maibé bola sei aas liu guarda rede.

Aitana F.C halo mudansa ba sira nia performa hodi halo substituisaun ba jogadór ho intensaun hakarak hetan golu. Nune’e, sira konsege marka duni golu iha minutu 26 liuhusi jogadór Richard Nano, hodi muda score ba 1-0.

Kontinua ba segnda parte, Emmanuel F.C halo kedas mudansa ba tátika no halo mós substituisaun ba jogadór hodi halo estratéjia dia’k iha liña avansadu no lansa atake ba adversáriu.

Ekipa Aitana F.C kontinua halo jogu ho hakarak atu aumenta golu iha segunda parte hodi save metin vitória ne’e, maibé ekipa adversáriu mós ihai liña klaran halo mós kontra atake.

Ekipa Emmanuel F.C ne’ebé iha ambisaun hakarak halo empata no buka rekolla pontu tolu iha jogu ne’e kontinua domina jogu no lansa atake sira ne’ebé lais, maibé sei falla.

Tama ba minutu 87, Emmanuel F.C liu husi nia jogadór Andenio Ximenes  hetan bola kruza ida husi nia maluk Fernando Mirin, maibé guarda rede  sei bele defende.

Iha minutu ikus jogu atu ramata 90+3, Emmanuel F.C susesu halo empata liu husi jogadór Jonh Lawani no score ne’e mantein to’o jogu termina.

Jornalista: Marito da Costa/Editór: Vito Salvadór