Ousmane Dembélé Hat-trick no Lori Fransa Lidera Grupu I hodi Hakat Ba Faze Eliminatóriu

Ousmane Dembélé.

Díli, 27 Juñu 2026 (RAFA.TL)- Jogadór estrella Fansa, Ousmane Dembéle susesu marka golu tolu (Hat-Trick) iha jogu ikus grupu I hasoru nia adversáriu Noruega iha Estádiu Gillette, Foxborough, Sábadu (27/06/2026).

Ekipa nasionál Fransa halo kedas jogu  ida agresivu iha minutu dahuluk no Kylian Mbappe konsege halo  jogu livre ida hodi lansa kedas bola ba baliza iha minutu ida, maibé bola ne’e sei kona deit trave.

Fransa ikus mai marka golu dahuluk iha minutu hitu liu husi Ousmane Dembélé hafoin simu bola husi Mbappe, no tama ba área penalidade hodi lansa suta ida ne’ebé maka’ás ho ain-loos ba rede hodi muda score ba 1-0.

Noruega estraga oportunidade di’ak ida iha minutu 14 liu husi Jorgen Strand Larsen ne’ebé kontrola ho di’ak pasazen ida hosi Aursnes, maibé nia suta sai dook husi alvu.

Dembélé hetan fali oportunidade darauk no marka tan golu ida ba nia ekipa iha minutu 20 hodi muda score ba 2-0.

Noruega mós mantein halo jogu ida ho kontra atake lais no responde kedas ho golu ida husi Thelo Asgaard hodi hamihis score ba 1-2 hafoin simu pasazen ida hosi Andreas Schjelderup no dirije nia suta ba iha kantu kraik-karuk.

Fransa kontinua domina jogu ne’e no marka golu datoluk iha minutu 32 liu husi Dembele hafoin simu pasajen husi Aurelien Tchouameni, ho golu ne´e kompleta Ousmane Dembélé nia Hat-trick no remata primeira parte ho scaore 3-1.

Tama ba segunda parte, ekipa rua mantein ho jogu ne’ebé iha no halo mós substituisaun ba jogadór sira hodi hasa’e liután ritmu jogu ,maibé ekipa rua sei mantein ho score ne’ebé iha.

Noruega hetan penalidade iha minutu 48 hafoin Oscar Bobb hetan falta hosi Theo Hernandez no Strand Larsen hakat ba oin hodi suta, maibé nia esforsu hetan salvasaun hosi Mike Maignan.

Noruega iha tan oportunidade ida iha minutu 72, maibé suta Bobb nian sei bele salva husi baliza adversáriu Maignan.

Tama ba tempu estra nian, Fransa aumenta tan golu ida iha minutu 90+4 liu husi Doue hafoin aproveita pasajen husi Bradley Barcola hodi marka golu no muda score ba 4-1.

Ho vitória ne’e, Fransa termina nia jogu iha faze apuramentu ho pontu sia husi jogu tolu iha ne´ebé ekipa ne´´e rekolla hotu vitóri no Noruega mantein iha pozisaun daruak ho pontu neen husi jogu tolu, manan rua no lakon ida. No husi rezultadu ne´e ekipa rua hakat hamutuk ba faze eliminatóriu.

Jornalista: Marito da Costa/Editór: Vito Salvadór