Austrália Kualifika Ba Faze Eliminatóriu Hafoin Empata ho Paraguai 0-0

Austrália vs Paraguai. Imajen/FIFA

Díli, 26 Juñu 2026 (RAFA.TL)- Ekipa selesaun nasionál Austrália kualifika ba faze eliminasaun hafoin empata 0-0 ho Paraguai iha jogu ikus faze apuramentu Grupu D Kopa Mundiál 2026.

Selesaun Nasionál Austrália ofisialmente hamutuk ona ho Estadus Unidus Amérika (EUA) kualifika ba faze eliminatóriu hafoin tur iha segunda klasifikasaun ho pontu haat husi jogu tolu, manan ida, empata ida no sofre derrota ida.

Iha minutu dahaat, Austrália liu husi nia jogadór Jackson Irvine hetan oportunidade atu lori nia ekipa lidera, maibé nia suta maka’ás ho ain-loos hetan salvasaun hosi guarda-rede Paraguai Orlando Gill. Austrália hetan oportunidade tuir mai liu husi Jordan Bos nia ain-karuk iha minutu 35 liuhosi suta ida ho distánsia dook; maibé, jogadór Feyenoord nia esforsu hetan salva ho fasil hosi Gill.

Australia kontinua halo atake ba adversáriu maibé ekipa Paraguai mantein disiplina no halo kontra atake lais liu husi kombinasaun jogadór sira iha lina meiu kampu no avansadu hodi buka oportunidade atu marka golu maibé sei falla. Ekipa rua mantein empata topo jogu primeira parte termina.

Tama ba segunda parte ekipa rua mantein halo jogu ida ho intensidade as maibé kontinua falla iha finalizasaun. Ekipa Paraguia nafatin halo tentativa atu marka golu maibé kontinua falla tamba adversáriu halo defeza ida metin no ho disiplina.

Austrália mos mantein nia ritmu jogu ho intensidade as maibé laiha oportunidade atu marka golu hafoi sutu sira ne´ebé iha la kona alvu no sei bele asegura husi guarda rede adversáriu. Ekipa rua mantein ho ritmu hodi defende ida-idak nia area nune´e laiha ida mak marka golu.

Tama ba minutu 81, ekipa rua halo jogu ida ho emosionante no intesnsidade as, jogadór Paraguai nian, Julio Enciso, ameasa ona baliza australianu nian maibé nia remate lakona alvu. No Minutu ida liutiha, jogadór Bos ameasa baliza paraguaiu nian hafoin hetan bola iha área penalidade nian, maibé jogadór adversáriu impede hodi la ezekuta remata ho diak nune´e laiha golu ruma akontese.

Iha minutu 89, Bos ne’ebé hanesan jogadór perigozu liu Austrália nian iha jogu ne´e ameasa fali baliza paraguaiu nian ho suta ida ne’ebé infelizmente sei dook husi tarjetu. Tama ba tempu estra iha minutu 90+2 Paraguai iha oportunidade di’ak liu atu marka golu bainhira Mauricio hetan bola iha área penalti australianu nian; maibé, nia suta fraku ho ain-karuk hetan salvasaun ho fasil hosi guarda-rede australianu Patrick Beach. Jogu ne’e remata ho eskoru 0-0.

Ho Rezultadu ne’e garante progresaun automátika Austrália nian ba eliminatória, enkuantu Paraguai ne’ebé remata iha terseiru lugar ho pontu haat kontinua iha kontensaun maibé tenke hein rezultadu husi grupu sira seluk.

Jornalista: David Gonçalves/Editór: Vito Salvadór