Úniku Golu husi Thapelo Maseko Lori Áfrika-Súl Ba Faze Eleminasaun

Úniku golu husi jogadór Thapelo Maseko lori Áfrika-Súl ba iha faze eliminasaauan hafoin halakon Koreia-Súl ho score 1-0. Imajen/Getty

Díli, 25 Juñu 2026 (RAFA.TL)-  Úniku golu husi jogadór Thapelo Maseko lori Áfrika-Súl ba iha faze eliminasaauan hafoin halakon sira-nia adversáriu Koreia-Súl ho score 1-0, iha jogu kontinuasaun grupu A Kopa Mundiál 2026 ne´ebé halao iha Estádiu BBVA iha Monterrey, Méxiku, Kinta (25/06/2026).

Ekipa Áfrika-Súl no Koreia-Súl hahú jogu ho tátika ne´ebé ekipa rua iha no iha ambisaun hakarak rekolla vitóri iha jogu ne´e hodi asegura billete ba faze eliminasaun. Áfrika-Súl halo kedas presaun ba defeza adversáriu liu husi atake ne´ebé iha. Ekipa Áfrika-Súl ne’ebé treina husi Hugo Henri Broos kria oportunidade oioin durante jogu primeira parte tomak maibé la konsege konverte ba golu.

Iha minutu neen, Relebohile Mofokeng halo tentativa ida ne’ebé seidok husi alvu. Oportunidade sira seluk monu ba Evidence Makgopa no Maseko, maibé defeza súl-koreanu no guarda-rede Kim Seung-gyu konsege mantein baliza seguru to’o intervalu.

Tama ba segunda parte, Koreia-Súl mós hahunhadia nia liña liu husi subtituisaun sira hodi lansa mos ameasa oioin liuhosi Lee Kang-in no Hwang Hee-chan, maibé liña kotuk Áfrika-Súl nian mantein dixiplinadu hodi kontra sira nia atake sira.

Tama ba minutu 63 jogadór Afrika-Súl Thapelo Maseko liu husi kolaborasaun ho nia kompatriota Tshepang Moremi ikus mai lansa golu ida hodi muda score ba 1-0. Hafoin golu ne´e ekipa Koreia-Súl aumenta sira nia intensidade atake nian hodi buka empata, maibé defeza Áfrika-Súl nian mantein metin to’o apitu finál.

Tuir estatístika, iha jogu ne´e, Afrika-Súl domina liu jogu no rejista rejista tentativa 13 ba golu kompara ho Koreia-Súl nia tentativa ualu. Ekipa ida-idak hetan kartaun mean ida, enkuantu totál falta 16 maka komete durante jogu.

Ho rezultadu ne’e, ekipa Afrika-súl tur iha segunda klasifikasaun Grupu A no avansa ba faze eliminatória hamutuk ho kampeaun Grupu A Méxiku, ne’ebé maka rejista vitória perfeitu ho score 3-0 hasoru Repúblika Xeka iha tempu hanesan hodi asegura sira nia fatin.

Koreia-Súl tenke hein atu haree se sira bele kualifika hanesan ekipa ida ne’ebé di’ak liu iha terseiru lugar entre Grupu E, H, I, no J.

Jornalista: David Gonçalves/Editór: Vito Salvadór