Kroásia Halakon Panamá no Asegura Posebilidade Hakat Ba Faze Eliminatóriu

Kroásia vs Panamá iha kopa mundiál 2026.

Díli, 24 Juñu 2026 (RAFA.TL)- Ekipa Nasionál Kroásia halakon Panamá ho score 1-0 no asegura posibilidade hakat ba faze eliminatóriu tanba kolekta pontu tolu husi jogu rua no diferensa golu ida husi Ekipa Nasionál Englatera no Gana iha grupu L Kopa Mundiál 2026.

Ekipa Nasionál Kroásia no Panamá joga iha Estádiu Toronto, Kuarta (24/06/2026), hatudu  ekipa nasionál Kroásia ameasa kedas iha minutu daruak, maibé bola kabesa hosi Luka Modric kona guarda-rede Panamá, Orlando Mosquera nia liman, no iha minutu dahaat suta Panamá nian husi Amir Murillo hetan blokeiu husi Josip Sutalo.

Panamá hetan oportunidade osan-mean iha minutu 23, maibé kabesa husi José Luis Rodríguez husi kruzamentu Amir Murillo hetan dezvia husi guarda-rede Dominik Livakovic no hafoin ne’e kona poste.

Ekipa Kroásia no Panamá lansa kontra atake ba malu no halo jogu ne’e ho intensiadade as hodi halo baliza husi ekipa rua tenke halo salvasaun sira ne’ebé brillante hodi asegura ekipa husi derrota. Too jogu primeira parte termina ekipa rua mantein ho score 0-0.

Hafoin deskansa, Kroásia konsege halo kontra atake no domina jogu sira hodi lansa kontra atake ba Panamá, no minutu 54 jogadór Kroási Ante Budimir lansa golu ida hodi muda score ba 1-0 hafoin aproveita bola kruzamentu husi nia kompatriota Josip Stanisic.

Jogadór Kroásia Marco Pasalic kuaze aumenta golu ba nia ekipa liu husi kontra-atake ida iha minutu 57, maibé nia remata hetan salva ho di’ak hosi Mosquera.

Pasalic lansa tan suta ida liu hosi baliza ninin, maibé nia tentativa daruak sai no dook husi alvu.

Panamá la rende, jogadór Amir Murillo hetan oportunidade osan-mean iha minutu 68, maibé nia suta ho distánsia besik salva hosi Livakovic. Lakleur de’it, Carlos Harvey nia kabesa husi kantu hetan mós salvasaun husi Livakovic.

Rodriguez mós ameasa baliza Kroásia nian iha minutu 78, maibé nia remate ho distánsia dook liu deit trave.

Score mantein 1-0 to’o jogu termina. H vitória ne´e ekipa nasionál Kroásia tuir iha oozisaun terseiru lugar ho pontu tolu hosi jogu rua, enkuantu Panamá iha klasifikasaun ikus ho pontu zero hafoin sofre derota dala rua.

Jornalista: Davilio Valdamir/Editór: Vito Salvadór