Ronaldo Marka Golu Rua no Lori Seleção das Quinas Manán Uzbekistaun 5-0

Ronaldo halo selebrasaun durante jogu. Imajen/Reuters

Díli, 24 Juñu 2026 (RAFA.TL)- Jogadór estrella Portugal, Cristiano Ronaldo marka golu rua no lori Seleção das Quinas (Portugal) manán Uzbekistaun ho score 5-0 iha jogu daruak grupu K Kopa Mundiál 2026.

Jogu entre ekipa nasionál Portugal no Uzbekistaun halao iha Estádiu Houston, Kuarta (24/06/2026), Portugál halo jogu ida agresivu no lansa kedas ataka dezde inísiu.

Ronaldo marka golu dahuluk iha minitu neen hodi muda score ba 1-0 hafoin aproveita ho di’ak João Cancelo nia pasajen hosi liman-loos.

Ho golu ne’e halo Portugal lansa atake no halo presaun beibeik ba defeza Uzbekista ho atake sira no obriga defeza Uzbekistaun tenke halo servisu maka’ás hodi asegura nia baliza, maibé tama ba minutu 17 defeza Uzbekistaun halo falta iha área penalidade nia oin no Nuno Mendes konsege aproveita bola falta ne’e hodi marka golu no muda score ba 2-0.

Uzbekistán ho kontra atake hafoin aproveita bola oportunidade ne’ebé iha hodi marka golu ida iha minutu 29 liu hosi G’Aniev nia suta dook, maibé, golu ne’e anula hosi VAR tanba falta ida antes ne’ebé halo ba jogadór Portugal João Cancelo.

Tama ba minutu 39, Kapitaun Portugál Ronaldo marka tan golu ida hodi muda score ba 3-0 hafoin aproveita bola kontra-atake lalais ne’ebé passa husi Bruno Fernandes iha liña klaran.

Ronaldo besik atu kompleta nia hat-trick iha tempu estra nian, maibé sei falla nune’e to’o intervallu score mantein ho 3-0 ba Portugal.

Tama ba segunda parte, Portugal kontinua domina jogu, iha minutu 58, Ronaldo besik atu kompleta nia hat-trick bainhira nia simu suta livre ida ne’ebé maka’as hosi Fernandes iha kaixa penalidade nia ninin.

Portugal hetan golu ida liu husi auto golu jogadór Uzbekistaun Nematov iha minutu 60  hafoin la antesipa bola kantu ne´ebé Portugal iha no muda score ba 4-0.

Portugal marka sira nia golu dalimak iha minutu 87 liuhosi Rafael Leão, hafoin aproveita kruzamentu Nelson Semedo nian husi liman los.

Ho vitória ne’e ekipa Portugal hametin hikas sira nia oportunidade hodi asegura billete ida ba faze eliminasaun no Uzbekistau otomatikamente sei eliminadu bainhira rezultadu Colombia no RD Congo empate iha jogu kontinuasaun grupu K nian.

Jornalista: David Gonçalves/Editór: Vito Salvadór