Kopa Mundiál 2026, Arjéria Halakon Jordânia 2-1

Ekipa Selesaun Nasionál Arjélia halakon nia adversáriu Jordânia ho score 2-1. Imajen/AP

Díli, 23 Juñu 2026 (RAFA.TL)- Ekipa Selesaun Nasionál Arjélia halakon nia adversáriu Jordânia ho score 2-1, iha jogu kontinuasaun Kopa mundiál 2026 faze grupu J, ne’ebé hala’o iha Estádiu San Francisco Bay Area, Santa Clara, Tersa (23/06/2026).

Iha primeira parte, Jordânia halo jogu ida ne’ebé nakloke no agresivu tebes hodi lansa atake ba nia adversáriu Arjélia.

Jordânia ameasa ho kabesa husi Nasir, maibé sei dook husi alvu. Ekipa Arjélia halo kedas kontra atake ida liu hosi suta Gouiri nian iha minutu dalima, maibé bola kona deit poste no sai ba liur.

Ekipa rua kontinua halo jogu ho intensidade as hodi lansa kontra atake ba malu maibé laiha golu ruma akontese no obriga ekipa rua tenke halo esforsu masimu ho ida-idak nia taktika hodi bele manan jogu ne’e.

Jordânia marka uluk golu ida iha minutu 36 liu husi nia jogadór  Nizar Al Rashdan hodi muda score ba 1-0, hafoin lansa sutu direita husi area penalidade nian.

Ho golu ne’e ekipa rua kontinua lansa kontra atake ba malu, maibé too intervallu ekipa rua mantein ho score 1-0.

Tama ba segunda parte, ho Arjélia lansa kedas presaun  ba Jordânia, maibé ekipa adversáriu sei bele salva bola no halo mos kontra atake hodi asegura score ne´ebé iha. Ho esforsu ne´ebé iha, Arjélia ikus-mai halo empata 1-1 liu husi golu Benbouali iha minutu 69 hafoin aproveita bola kantu no halo kabesada ida ne´ebé direitamente tama ba rede adversáriu.

Jordânia iha oportunidade liu-hosi Al Mardi liu husi kontra atake ida ne’ebé lalais, maibé adversáriu sei bele blokeia atake ne’e hodi mantein ho score 1-1.

Tama ba minutu 82, Arjélia marka tan golu ida liu husi bola kantu no jogadórAmine Gouiri aproveita bola barullu iha baliza adversáriu nia area penalidade laran no lansa kedas golu hodi musa score ba 2-1.

Ho rezultadu ida ne’e lori, Arjélia sa’e ba terseiru lugar ho pontu tolu hosi jogu rua no mantein sira nia esperansa atu hakat ba faze eliminasaun no sei iha jogu desizivu hasoru Áustria iha iha loron 28 fulan-Juñu hodi hadau billete faze 32 nian.

Jornalista: David Gonçalves/Editór: Vito Salvadór