Kopa Mundiál 2026, Uruguai ho Cabo Verde Empata 2-2

Cabo Verde kontinua halo Uruguai hakfodak. Imajen/REUTERS

Díli, 22 Juñu 2026 (RAFA.TL)- Ekipa nasionál Uruguai fahe pontu hanesan ho nia adversáriu  Cabo Verde hafoin empata ho score 2-2, iha jogu kontinuasaun grupu H Kopa Mundiál 2026.

Jogu entre ekipa rua ne’ebé halao iha Estádiu Miami, Segunda (22/06/2026), Uruguai halo presaun iha kedas inísiu jog.

La Celeste iha oportunidade iha minutu 13 liu husi atake ida ne’ebé lalais halo Federico Valverde livre iha parte karuk kaixa penalidade nian, maibé nia suta sei dook husi alvu.

Ho jogu ne’ebé iha Cabo Verde mak iha uluk vantajen iha minutu 21 hodi marka uluk golu liu husi jogadór Kevin Vina liu husi suta livre ida ne’ebé maka’as ho distánsia dook no bola tama iha kantu karuk hosi baliza Fernando Muslera nian no muda score ba 1-0.

Ekipa selesaun nasionál Uruguai halo kedas amiasa ida iha minutu 27, maibé nia sutu direita ne’ebé lansa maka’ás liu no bola liu deit husi poste leten baliza nian.

Uruguai kontinua hakat ba oin hodi buka golu empata. Maxi Araujo iha oportunidade atu kabesa kruzamentu, maibé nia kabesa mós sai hosi alvu.

Molok tempu primeira parte termina, Uruguai marka golu ida iha minutu 44 liu husi jogadór Maxi Araujo hodi muda score ba 1-1.

Liu deit minutu lima, Uruguai aumenta tan golu ida liu husi Agustin Canobbio hodi muda score ba 2-1 no Uruguai lidera provizoriu molok ba intervallu.

Tama ba segunda parte ekipa rua mantein ho ritmu ne´ebé iha no lansa kontra atake ba malu, maibé Cabo Verde iha uluk oportunidade hodi halo amiasa ida maibé laiha golu ruma aumenta.

Cabo Verde kontinua halo substituisaun iha liña avansadu hodi hasa’e intensidade jogu iha liña oin no buka halo empata  esforsu ne´e lori dunik rezultadu iha minutu 61 liu husi golu Helio Varela hodi muda score ba 2-2.

Uruguai iha oportunidade atu hatama golu husi bola kantu liu husi Araujo. Maibé, golu ne’e la permite hosi VAR tanba offside.

Valverde lakon oportunidade osan-mean ida iha minutu ikus jogu nian. Nia la konsege halo ligasaun ho kruzamentu Darwin Nunez nian iha baliza oin nune´e falla marka golu.

To’o jogu termina ekipa rua iha forsa hanesan no mantein ho score 2-2 no fahe pontu hanesan hodi hein jogu ikus iha faze apuramentu hodi hadau malu billete ida ba faze eliminatóriu faze 32.

Jornalista: Davilio Valdemir/Editór: Vito Salvadór