Béljika Falla Rekolla Pontu Tolu iha Jogu Daruak Hafoin Empata ho Iraun 0-0

Jogu Béljika ho Iraun empata 0-0. Imajen/FIFA

Díli, 22 Juñu 2026 (RAFA.TL)- Ekipa selesaun nasionál Béljika falla rekolla pontu tolu iha jogu daruak hafoin empata ho Iraun 0-0, iha jogu kontinuasaun Kopa Mundiál grupu G ne’ebé hala’o iha Estádiu Los Angeles, Estadus Unidus, Segunda (22/06/2026).

Iha jogu hahú primeira parte, ekipa Béljika domina jogu ho kalma no sempre halo pasajen sira ho akuradu. Nune’e, halo ekipa adversáriu falla atu halo balansu.

Ekipa Iraun tenta halo balansu ba jogu ne’e hodi halo mós kontra atake. Ekipa rua halo jogu ida ho balansu, maibé agresividade ekipa rua nian la rezulta golu ruma.

Iraun konsege hakat liu baliza Béljika nian iha minutu 25 liuhosi Mehdi Taremi no lansa kedas sutu ida, maibé bola kona deit iha poste.

Jogadór Iraun Mehdi Taremi ne’ebé joga ba klubu Olympiacos konsege domina duelo ho baliza Béljika Thibaut Courtois hafoin hetan pasajen husi Ehsan Hajsafi, maibé, golu ne’e VAR la permite tanba Taremi antes ne’e iha ona pozisaun offside.

Béljika kontinua depende ba kriatividade husi Kevin De Bruyne no Youri Tielemans hodi harahun defeza Iraun nian, maibé liña kotuk Iraun nian ne’ebé disiplina no dezempeñu brillante husi guarda-redes Alireza Beiranvand mantén eskoru 0-0 too intervalu.

Tama ba segunda parte, Béljika kontinua halo kontrolu ba jogu no kria oportunidade oioin. Treinadór Béljika Rudi Garcia koko halo subtituisaun hodi hatama avansadu Dodi Lukebakio no Hans Vanaken hodi aumenta atake sira maibé seidauk iha rezultadu.

Situasaun muda maka’ás iha minutu 66 bainhira Béljika hetan redusaun ba jogadór hafoin Nathan Ngoy hetan kartaun mean tanba falta ida hasoru Taremi, ne’ebé manan duelo no hetan oportunidade atu marka golu maibé Nathan deside halo falta no simu konsekuensia kartaun mean direita.

Ho vantajen numérika, Iraun hahú halo presaun ho agresivu liu no ameasa baliza belga dala barak. Maibé, Courtois hatudu nia kualidade hanesan guarda-rede ida ne’ebé di’ak liu iha mundu hodi mantein nia baliza ho seguru.

To’o jogu termina, ekipa rua mantein ho score 0-0, ho nune’e, ekipa rua tenke fahe pontu hanesan iha grupu G ho pontu rua husi jogu rua tanba empata hotu.

Jornalista: David Gonçalves/Editór: Vito Salvadór