Kopa Mundiál 2026, Ekuadór Fahe Pontu Hanesan ho Curação

Eloy Room, guarda-rede Curaçao, simu bola ho di'ak iha jogu hasoru Ekuadór, 21 Juñu 2026. Imajen/Getty

Díli, 21 Juñu 2026 (RAFA.TL)- Selesaun ekuatorianu empata ho nia adversáriu ekipa Curação iha jogu daruak grupu E, Kopa Mundiál 2026, ne’ebé hala’o iha Estádiu Kansas City,  Estadus Unidus, Domingu (21/06/2026).

Dezde jogu primeira parte hahú, Ekuadór foti kedas inisiativa hodi fó presaun maka’ás ba nia adversáriu Curação no halo jogu ekipa rua jogu  intensidade às.

Haku’ur ba iha minutu da-toluk, jogadór Ekuadór Enner Valencia liberta suta ida ne’ebé hetan salva husi guarda-rede Coração Eloy Room. Ekuadór kontinua joga ho agresivu, sobu Curação nia defeza ne’ebé metin.

Iha minitu 30, ekipa Curação halo jogu ida ho disiplina no sai husi presaun hodi lansa kedas atake ba Ekuadór. Iha minutu 42, John Yeboah eskapa hosi defeza Curação iha área penalti nian no lansa tiru ida ne’ebé maka’ás, maibé sei salva hosi Eloy Room. Score mantein 0-0 to’o tempu intervalu.

Iha segunda parte, Ekuadór tenta atu halo presaun liután hodi aproveita movimentu hosi sira nia liña avansadu iha parte los no karuk. Maibé, Curação mantein disiplina no halo kontra atake ne’ebé di’ak hodi salva sira nia baliza husi bola sira adversáriu nian.

Iha minutu 59, Gonzalo Plata besik atu marka golu ba nia ekipa, maibé nia esforsu sira sei falla no halo ekipa rua mantein ho score 0-0.

Liu tiha minutu ida, jogadór Curação lansa suta ida husi liur área penalidade nian, ne’ebé salva husi guarda-rede ekuatorianu Hernan Galindez.

uoração kontinua halo presaun ho tentativa sira ho distánsia dook, maibé baliza Ekuadór halo antesipasaun ho di’ak. Too jogu termina, ekipa rua mantein ho score 0-0 no fahe pontu hanesan.

Ho rezultadu empata ne’e halo ekipa selesaun nasionál Ekuadór no Curação sira nia posibilidade atu hakat ba faze eliminatória mihis tanba ekipa rua rekolla de’it pontu ida husi jogu rua no tur iha terseiru no kuartu klasifikasaun grupu E.

NTV/ETO-Telco ne’ebé halo parte iha empreza grupu Esperança Timor Oan (ETO) mak iha direitu ofisiál halo transmisaun eskluzivu jogu Kopa Mundiál 2026 iha Timor-Leste.

Jornalista: Davilio Valdamir/Editór: Vito Salvadór