Mundiál, Selesaun Samurai Blue Halakon Tunízia ho Score 4-0

Daichi Kamada (15) husi Japaun selebra golu dahuluk husi nia ekipa durante jogu Grupu F Kopa Mundiál FIFA 2026 entre Tunízia no Japaun iha Estádiu Monterrey, Méxiku 20 Juñu 2026. Imajen/Getty

Díli, 21 Juñu 2026 (RAFA.TL)- Selesaun japoneza ka Samurai Blue halakon Tunízia iha Kopa Mundiál 2026 hafoin manan ho score 4-0.

Jogu ne’ebé hala’o iha Estádiu Monterrey, Guadalupe, Méxiku, Domingu (21/06/2026), ekipa Samurai Blue marka  golu dahuluk liu husi Daichi Kamada  Ayase Ueda no Junya Ito.

Derrota ida-ne’e halo Tunízia hamutuk ho Turkia no Haiti eliminadu hosi Kopa Mundiál 2026.

Iha jogu ne’e selesaun nasionál Japaun ka ekipa Samurai Blue joga lahó Takefusa Kubo ne’ebé sofre aleiza.

Samurai Blue marka kedas golu ida iha minutu haat liu husi jogadór Daichi Kamada, ne’ebé konverte kruzamentu husi Keito Nakamura nian hodi muda score ba 1-0.

Hafoin ne’e Japaun aumenta tan golu ida iha minutu 30 liu husi avansadu Ayase Ueda bainhira suta maka’ás husi área penalti nia liur hodi muda ba 2-0. Golu ne’e mantein too jogu primeira parte termina.

Kontinua ba segunda parte, treinadór Tunízia Hervé Renard halo mudansa lalais, lori Amine Ben Hmida no Ismael Gharbi hodi troka Dylan Broonn no Elias Saad.

Mudansa sira ne’e  la rezulta estratejia ka tátika signifikativu, maibé ekipa selesaun nasionál Tunízia nafatin enfrenta difikuldade.

Iha parte seluk, Japaun joga ho konfortavel, konsege marka golu datoluk iha minutu 69 liuhosi Junya Ito, ne’ebé marka nia golu dahuluk hosi Mundiál 2026.

Junya Ito nia golu ba-dala 16 iha jogu 71 ba selesaun japoneza. Ito nia golu mosu hafoin aproveita asisténsia husi Ueda hodi muda score ba 3-0.

Treinadór Hajime Moriyasu halo mudansa oioin, maski nune’e, Japaun nafatin konsege aumenta tan golu ida liuhosi Ueda, ne’ebé sai hanesan estrela jogu nian.

Avansadu Feyenoord marka golu rua no asisténsia ida, ho nia golu daruak hosi enkontru ne’ebé mosu iha minutu 84, dala ida ne’e ho kabesa hosi kruzamentu Kaishu Sano nian no muda score ba 4-0.

Ida ne’e hanesan vitória dahuluk Japaun nian iha Kopa Mundiál 2026 no lori ekipa Samurai Blue ba segundu klasifikasaun ho pontu haat, diferensa golu ho Olanda ne’ebé halakon Suésia ho score 5-1.

Asiste transmisaun direta Kopa Mundiál 2026 iha kanál ofisiál NTV/ETO-Telco.

Jornalista: David Gonçalves/Editór: Vito Salvadór