Suisa Rekolla Vitória Dahuluk Hafoin Halakon Bósnia 4-1

Johan Manzambi marka golu rua iha vitória Suisa hasoru Bósnia iha jornada daruak Grupu B Tasa Mundiál 2026• Imajen/FIFA

Díli, 19 Juñu 2026 (RAFA.TL)- Ekipa selesaun nasionál Suisa rekolla vitória dahuluk hafoin halakon Bósnia & Herzegovina ho score 4-1 iha jogu daruak hosi Grupu B, Kopa Mundiál 2026 iha Estádiu Los Angeles, Estadus Unidus, Sesta (19/06/2026).

Iha jogu ne’e ekipa selesaun nasional  Suisa marka golu haat liu husi, Johan Manzambi, Ruben Vargas, no penalidade ida hosi Granit Xhaka.

Ekipa Bósnia konsege responde ho golu ida  liu hosi Ermin Mahmic iha minutu ikus jogu atu termina.

Suisa domina dezde inísiu no ameasa kedas liuhosi Dan Ndoye iha minutu 10, maibé, suta avansadu ne’e la’o dook hosi baliza Bósnia nian.

Ndoye iha tan oportunidade minutu 10 liu tiha, dala ida ne’e nia suta ba sentru baliza salva husi guarda-rede Nikola Vasilj.

Bósnia konsege de’it hatán iha finál primeira parte nian. Iha minutu 38’, Amar Dedic halo suta ida ne’ebé fasilmente hapara husi guarda-rede Suisa Gregor Kobel. Eskoru mantein 0-0 to’o intervallu.

Tama ba segunda parte, Suisa kontinua aumenta presaun, jogadór Breel Embolo besik atu loke markadór iha minutu 63, maibé nia oportunidade hetan impedimentu hosi Vasilj.

Impase ne’e ikusmai kotu iha minutu 74. Kruzamentu ida hosi parte karuk hasoru hosi Johan Manzambi, ne’ebé ho fásil halakon Vasilj hodi fó vantajen ba Suisa ho 1-0.

Dezastre akontese ba Bósnia lakleur hafoin Tarik Muharemovic simu kartaun mean tanba falta ida hosi kotuk hasoru Embolo.

Suisa aproveita oportunidade sira ho  vantajen numérika, Ruben Vargas duplika vantajen iha minutu 84 ho remate baixu hafoin hetan pasajen husi Embolo.

Manzambi aumenta tan golu ida iha minutu 90, hodi hakotu Vargas nia redusaun hodi fó vantajen ba Suisa ho 3-0.

Bósnia konsege hamenus defisit iha tempu lezaun liu husi Ermin Mahmic suta maka’as husi liur area penalidade iha minutu 90+3. Maibé, Suisa hatán lalais hodi hetan penalidade minutu haat liutiha. Granit Xhaka hakat ba oin hodi foti penalti no konverte ho susesu, hodi asegura vitória 4-1 ba Suisa.

Vitória ida-ne’e lori Suisa ba lidera Grupu B Kopa Mundiál 2026 ho pontu haat hosi jogu rua. Entretantu, Bósnia tun ba zona okos tabela klasifikasaun povizoria ho pontu ida.

Jornalista: David Gonçalves/Editór: Vito Salvadór