Repúblika Xeka Fahe Pontu Hanesan ho Áfrika-Súl Hafoin Empata 1-1

Imajen/Repro.FIFA

Díli, 19 Juñu 2026 (RAFA.TL)- Repúblika Xeka no Áfrika-Súl fahe pontu hanesan iha jogu daruak hosi Grupu A Kopa Mundiál 2026 hafoin termina jogu ho score 1-1.

Jogu entre Repúblika Xeka hasoru Áfrika-Súl ne’ebé hala’o iha Estádiu Atlanta, Sesta (19/06/2026), Repúblika Xeka halo presaun iha inísiu jogu nian no konsege marka golu hafoin jogu la’o iha minutu neen.

Adam Hlozek hahú atake hosi sorin-loos no halo redusaun ida ne’ebé maka dezvia hosi Alexandr Sojka no bola ne’e kruza ba Michal Sadilek no marka kedas golu hodi muda score ba 1-0.

Áfrika-Súl sai neineik hosi presaun Xeka nian, jogadór Iqraam Rayners iha minutu 16 hetan oportunidade atu halo kruzamentu, maibé nia esforsu seidauk kona alvu.

Rayners iha tan oportunidade ida iha minutu 36, no kontrolu ladún di’ak, hodi permite jogadór Matej Kovar  asegura bola. Nune’e,  score 1-0  mantein to’o intervalu.

Tama ba segunda parte, ekipa rua kontinua lansa kontra atake ba malu.  Jogadór Repúblika Xeku Lukas Cerv lansa tentativa ida ho distánsia dook, maibé nia suta hetan salvasaun hosi Ronwen Williams.

Duelo ne’e sai maka’ás no intensidade jogu aumenta. Teboho Mokeona hetan oportunidade hodi kabesa bola iha minutu 76, maibé nia kabesa neineik liu halo Kovar salva ho fasil.

Áfrika-Súl kontinua lansa kontra atake  ba nia adversáriu hodi buka oportunidade sira atu halo empata no posibilidade rekolla vitória, maibé adversáriu mantein solidu no ekipa rua kontinua halo ritmu ho jogu ida makas.

Tama ba minutu 83 Áfrika-Súl hetan oportunidade penalidade ida hafoin jogadór Repúblika Xeka halo falta iha grande área laran.

Jogadór Áfrika-Súl Thapelo ne’ebé ezekuta penalidade ne’e susesu marka golu hodi muda score ba 1-1.

Ekipa rua ne’e kontinua halo kontra atake ba malu, maibé laiha tan golu ruma akontese nune’e ekipa rua mantein ho score 1-1 too jogu remata.

Jornalista: David Gonçalves/Editór: Vito Salvadór