Gana Manan Panamá ho Dramatiku 1-0

Selesaun Nasionál Gana manan nia adversáriu Panamá ho dramatiku ho score 1-0. Imajen/ Concacaf

Díli, 18 Juñu 2026 (RAFA.TL)-  Selesaun Nasionál Gana manan nia adversáriu Panamá ho dramatiku ho score 1-0.

Iha jogu primeiru parte iha iha Estádiu Toronto, Kinta (18/06/2026), Panamá halo uluk ameasa ba guarda rede Gana iha minutu rua  liuhusi sutu maka’ás jogadór Cecilio Wterman iha área penalidade, maibé bola sei bele defende husi guarda rede Lawrence Ati Zigi.

Panamá kontinua halo ameasa ba-daruak iha minutu lima, liuhusi sutu maka’ás  husi jogadór Cesar Blackman, maibé bola ne’ebé nia sutu sei bele antisipa husi liña defensivu Gana nian.

Ekipa rua performa agresivu,  maibé Gana nafatin mantein kalma hodi hein fallansu ne’ebé iha hodi halo atake, nune’e sira mós hetan oportunidade  hodi lansa kontra atake maka’ás, maibé defeza husi Panamá konsege hasai bola.

Tama ba minutu 38, Panamá fila fali hetan oportunidade. Nafatin husi asaun sutu maka’ás husi Jogadór Jiovany Ramos, maibé bola  seidauk kona alvu.  Ho nune’e, score 0-0 mantein to’o termina jogu  primeiru parte.

Kontinua ba segundu parte, Gana hahú halo presaun liu husi performa ida impresimu husi jogadór jogadór Jonas Adjetey ne’ebé oportunidade iha minutu 48 liuhusi bola ulun, maibé guarda rede Panamá sei bele defende.

Jogadór sira Gana nian agresivu tebes, maibé ekipa adversáriu mantein kalma hodi lansa mós kontra atake ba malu.

Ekipa rua hasa’e ritmu jogu, maibé laiha ida mak marka uluk golu to’o iha minutu 75 ekipa rua sei mantein ho score 0-0.

Tama ba minutu 80 ekipa Panamá lansa kontra atake lais ida, maibé sei bele asegura husi adversáriu Gana hodi halo balansu ba jogu ho ritmu ne´ebé iha.

Substituisaun sira ne’ebé ekipa rua halo mantein la fó rezultadu másimu iha jogu ne´e.

Ekipa rua kontinua hatudu sira nia jogu agresivu hodi  halo kontra atake ba malu ho intensidade jogu ida aas hodi buka atu manan iha jogu ne’e, nune’e iha minute ikus jogu atu ramata 90+4 Jogadór  Gana Yirenkyi susesu marka golu ida hodi lori  Gana  manan ho score 1-0.

Golu ne’e akontese hafoin Yirenkyi  simu bola kruza husi nia kompatriota Brandon Thomas-Asante.

Ho vitória score 1-0 ne’e lori Gana rekolla pontu tolu no sa’e ba pozisaun daruak tabela klasifikasaun provizoriu, lakon produtividade golu husi Inglatera ne’ebé manan ho score 4-2.

Jornalista: Marito da Costa/Editór: Vito Salvadór