Seleção das Quinas Falla iha Jogu Primeiru no Empata ho RD Congo 1-1

Jogadór RD Congo, Yoane Wissa, marka golu liu husi bola kabesa hodi hatuur score 1-1 iha minutu 45+5 Kopa MUndiál 2026.

Díli, 17 Juñu 2026 (RAFA.TL)- Ekipa Selesaun Nasionál Portugál (Seleção das Quinas) falla iha jogu dahuluk kontra RD Kongo no tenke fahe pontu hanesan hafoin empata ho score 1-1.

Jogu entre ekipa Portugál no RD  Congo halao iha Estádiu Houston, Kinta (18/06/2026), hahú ho ritmu  jogu ne’ebé  ekipa Seleção das halo presaun desde inísiu ba RD Congo.

Seleção das Quinas ne´ebé lidera husi treinadór Roberto Martinez marka uluk golu ida ba sira-nia adversáriu RD Congo liu husi jogadór  João Neves nia kabesada hafoin aproveita kruzamentu Pedro Neto nian iha minutu neen hodi muda score ba 1-0.

Portugál kontinua atake hafoin jogadór Nuno Mendes ameasa ho suta maka’ás iha minutu 18, maibé bainhira nia iha baliza nia oin, nia lakon kontrolu bola, hodi permite Mpasi sai no salva bola ne’ebé iha no Bruno Fernandes koko aproveita bola ne’ebé iha, maibé kontinua falla.

Portugál kontinua kontrola jogu ne’e, entretantu, DR Congo luta atu dezenvolve sira-nia jogu ho kontra atake ne’ebé iha hafoin desde inisiu sira aplika kedas jogu ida defensivu ho defeza lima ne´ebé solidu tebes.

Jogadór RD Congo, Edo Kayembe tenta halo ameasa ho tiru dook, maibé bola ne’ebé iha sei bele salva husi baliza Portugál Diogo Costa iha minutu 33.

Portugál sofre golu ida iha minutu ikus husi primeira parte, iha ne’ebé pasajen husi Arthur Masuaku liu husi bola kantu no jogadór Yoane Wissa, marka kedas golu liu husi bola kabesa hodi muda score ba 1-1 iha minutu 45+5.

Tama ba jogu segunda parte, RD Congo hahú joga ho agresivu liutan, maibé mantein asegura área kotuk ho defeza lima.  Portugál kontinua domina bola, maibé joga lentu no sempre dada bola mai kotuk halo ekupa Seleção das Quinas la iha oportunidade atu marka golu.

Ho situasaun ne’e treinadór Roberto Martinez halo substituisaun ba jogadór hodi hatama  Francisco Conceição ho ritme foun ba flanku loos Portugál nian.

Conceição konsege tama iha kaixa penalti no halo redusaun no lansa ameasa sira, maibé defeza RD Congo sei solidu.

Ekipa rua konsege lansa kontra atake ba malu no Bruno Fernandes lansa suta maka’ás ida ho distánsia dook iha minutu 89, maibé ida-ne’e dook hosi baliza nia sorin karuk. To’o jogu termina ekipa rua maintein ho score 1-1.

Jornalista: Marito da Costa/Editór: Vito Salvadór