Kopa Mundiál 2026, Béljika no Ejiptu Fahe Pontu Hanesan ho Score 1-1

Lukaku no De Bruyne selebra golu empata husi Béljika hasoru Ejiptu iha Tasa Mundiál. Imajen/AFP

Díli, 16 Juñu 2026 (RAFA.TL)- Ekipa nasionál Béljika no Ejiptu fahe pontu hanesan iha jogu apuramentu Kopa Mundiál Grupu G hafoin ekipa rua empata ho score 1-1.

Jogu ekipa rselesaun nasionál Béljika ho Ejiptu ne’ebé  hala’o iha Estádiu Seattle,  Tersa (16/06/2026),  hatudu Ejiptu marka uluk golu ida ba nia adversáriu  Béljika  liu husi jogadó Emam Ashour no Béljika halo empata iha segunda parte liuhosi autogolu Mohamed Hany.

Iha jogu hahú, ekipa Béljika halo kedas presaun ho tentativa suta sira hosi liur área penalidade nian hosi Leandro Trossard no Kevin de Bruyne seidauk kona alvu.

Ejiptu hetan vantajen iha minutu 19, liu husi jogadór Emam Ashour no marka kedas golu hodi muda score iha tabela pontuasaun nian, hafoin simu asistente husi Mohamed Salah no lansa kedas suta maka’ás ida hosi liur área penalidade nian no halo baliza Thibaut Courtois la konsege hapara bola, ne’ebé tama ba rede laran no golu ne’e lori Ejiptu lidera 1-0.

Ejiptu kuaze aumenta tan golu ida iha minutu 32, Mostafa Zico nia suta kona alvu iha área penalidade, maibé sei bele salvasa hosi Courtois.

Béljika hetan oportunidade osan-mean iha tempu estra nian, jogadór Jeremy Doku nia meia-volei iha área penalti nian semo liu deit husi trave leten.

Tama ba segunda parte, Béljika iha oportunidade osan-mean rua iha minutu 61, jogadór Youri Tielemans halo suta volei dook hosi baliza, enkuantu Kevin de Bruyne nia suta iha alvu hetan salva hosi guarda-rede Mostafa Shoubir.

Romelu Lukaku ne’ebé tama hanesan jogadór substituisaun iha minutu 66 lori impaktu pozitivu ba nia ekipa. Lukaku simu asistensia husi nia kompatriota Thomas Meunir no bola ne’ebé Lukaku lansa kona defeza Ejípsiu Mohamed Hany nia ain no tama ba rede, ho auto golu ne’e muda kedas score ba 1-1.

Béljika kuaze aumenta tan golu ida iha minutu 82, liu husi jogadór Brandon Mechele liu husi bola kabesada maibé sei bele salva hosi baliza Ejiptu Shoubir.

Ekipa rua mantein ho score 1-1 to’o jogu termina no ekipa rua rekolla pontu ida iha jogu ne’e, hodi prepara ba jogu seluk tuir mai iha grupu G.

Asiste jogu kopa mundiál iha kanál ofisiál kopa mundiál 2026 iha NTV/ETO-Telco ho live estreaming iha  tv.timortelecom.tl.

Jornalista: David Gonçalves/Editór: Vito Salvadór