España Falla Marka Golu iha Jogu Dahuluk Kontra Cabo Verde

Ho eskoru 0-0, España no Cabo sai favoritu. Imajen/Repro

Díli, 16 Juñu 2026 (RAFA.TL)- Ekipa selesaun nasionál España (La Furia Roja) falla marka golu iha sira nia jogu dahuluk kontra selesaun nasionál Cabo Verde, nune’e ekipa rua fahe pontu hanesan ho empate 0-0.

Ho rezultadu ne’e, Cabo Verde hatudu katak futeból la’ós se mak iha naran, maibé tenke mai ho determinasaun, disiplina, unidade no esforsu koletivu ba objetivu ida.

Jogu entre España hasoru Cabo Verde ne’ebé hala’o iha Estádiu Atlanta, Segunda (15/06/2026), selesaun Españól domina kedas jogu ho kontrollu bola  desde inísiu primeira parte. Maibé, España nia luta atu marka golu  defisil tanba iha liña kotuk Cabo Verde nian halo seguransa ida rápida no metin.

Jogadór España Pedri koko suta ho distánsia dook, maibé nia suta ne’e fasil salva hosi baliza Cabo Verde Vozinha.

España kontinua luta atu kria oportunidade sira to’o meiu primeira parte, maski sira nia presaun kontinua asegura másimu husi adversáriu.

Cabo Verde tenta oportunidade ida liu hosi Jovane Cabral iha minutu 37, maibé suta husi parte karuk sai dook husi alvu.

Ekipa España kontinua hetan oportunidade osan-mean iha minutu 39, jogadór Marc Cucurella tama iha kaixa penalidade no soe bola ba Ferran Torres iha baliza oin, maibé Ferran nia suta kona poste.

Mikel Oyarzabal nia kabesa ne’ebé lakon mós hetan salvasaun hosi Vozinha.

Baliza Cabo Verde Vozinha halo salvasaun brillante rua iha primeira parte nia rohan liu husi nia asaun hodi trava Ferran nia suta besik.

Baliza ne’ebé ho idade 40 ne’e kontinua hamriik hodi asegura Aymeric Laporte nia kabesa husi kantu, no  to’o primeira parte remata ekipa rua mantein ho score 0-0.

Hafoin deskansa, tama ba segunda parte ekipa rua la halo mudansa barak no situasaun jogu kontinua ho ritmu ne’ebé iha.

España kontinua halo presaun. Maibé  Cabo Verde hili atu joga barak liu iha nia área no hein bola oportunidade mak lansa kontra atake.

Estratéjia Cabo Verde nia ne’e sufisiente atu asegura sira nia baliza husi España nia atake sira no tama ba minutu 73 jogadór España Mikel Merino iha oportunidade atu marka golu, maibé ninia remata hetan salva husi baliza Cabo Verde Vozinha.

Iha minutu 81, Cucurella simu bola loos iha kaixa penalidade, maibé bola kabesada ne’e sei nafatin asegura ho di’ak husi baliza Cabo Verde Vozinha ne’ebé ho fasil los kaer bola ne’e.

España kontinua lansa atake ba Cabo Verde hodi buka golu manan nian, no Oyarzabal iha oportunidade iha minutu 88 bainhira simu bola husi Dani Olmo iha baliza oin no defeza Cabo Verde Roberto Lopes halo blokeiu krusiál ida iha Oyarzabal nia suta. Jogu ne’e mantein laiha golu, no empata ho score 0-0 hafoin minutu 90.

Jornalista : Marito da Costa/Editór: Vito Salvadór