Golu Úniku Amad Diallo Kontribui Vitória Ba Les Elephants

Joador Amad Diallo

Díli 15 Juñu 2026 (RAFA.TL)- Ekipa nasionál Kosta Marfim (Les Elephantes) susesu rekolla vitória importante iha jogu kontinuasaun Kopa Mundiál 2026 Grupu E liu husi golu úniku jogadór Amad Diallo iha minutu 90.

Jogu entre Kosta Marfim hasoru Ekuadór ne’ebé hala’o iha Estádiu Philadelphia, Segunda (15/06/2026), ekipa rua halo jogu ho intensidade aas desde primeira parte. E

Ekipa nasionál Ekuadór halo uluk atake ba  nia adversáriu iha minutu 21, maibé esforsu husi jogadór John Yeboah sei kona deit poste (baliza nia Rin).

Ekuadór kontinua lansa atake ba Kosta Marfim iha minutu 30 liu husi jogadór Alan Minda ne’ebé hetan oportunidade hafoin pasajen husi Pedro Vite, no lansa kedas suta direita no bola konsege ultrapasa jogadór adversáriu Yahia Fofana maibé nafatin poste.

Ekuadór hala’o jogu ida ne’ebé dominante liu, maibé la konsege atu marka golu liu husi oportunidde sira ne’ebé iha no score mantein 0-0 to’o intervallu.

Hafoin deskansa, Kosta Marfim hetan fali oportunidade hodi lansa atake perigu ida ba adversáriu Ekuadór liu husi jogadór Bazoumana Toure maibé bola kona de’it poste.

Hakat ba oin ho ambisaun maka’ás liután, Kosta Marfim liu husi nia jogadór Gonzalo Plata tenta atu sobu Ekuadór nia defeza ho suta ida ho distánsia dook no tentativa ne´e hetan blokeiu husi Fofana.

Hafoin ekipa rua lansa kontra atake ba malu, ikus mai eroi Kosta Marfim nian Amad Diallo, marka golu vitória ba nia ekipa hafoin simu asistensia bola husi Wilfred Singo iha área penalidade nia ninin no lansa kedas bola ba iha parte kantu loos hosi rede ekuatorianu nian hodi muda score ba 1-0.

Kosta Marfim mantein vitória ne´e to’o jogu remata no ho vitória ida-ne’e hatuur Kosta Marfim iha segundu klasifikasaun Grupu E ho pontu tolu.

Kosta Marfim iha pontu hanesan ho Alemaña ne’ebé okupa primeira klsaifikasaun tanba iha produtividade golu hafoin manan Curaçao ho score 7-1.

Entertantu, ekipa nasionál Ekuadór iha terseiru lugar, no Curaçao okupa zona mean iha Grupu E ho pontu zero.

Jornalista: Marito da Costa/Editór: Vito Salvadór