Mushila F.C Kampiaun Kopa AFTL 2026

Díli, 15 Juñu 2026 (RAFA.TL), Mushila F.C susesu foti titúlu Kampiaun Kopa Asosiasaun Futsal Timor Leste (AFTL)  2026 hafoin halakon nia adversáriu Mauputar F.C iha finál ho score fantástiku 5-2.

Jogu finál ne’ebé hala’o iha Kampu Futsal FALINTIL- Forsa Defeza Timor-Leste (F-FDTL), Domingu (14/06/2026), ekipa rua hahú jogu ho ritmu agresivu hodi lansa kontra atake ba malu. Maibé tama ba iha minutu rua sorte di’ak monu ba ekipa Mushila F.C hodi lansa uluk golu ida ba rede Mauputar F.C liu hosi asaun Evinho Guterres iha minutu rua, hafoin simu asistensia bola kruza hosi nia kompatriota João Paulo Canizo iha linha karuk.

Ho golu lais hosi ekipa Mushila F.C nian ne’e halo tensi jogu kontinua manas liután ba ekipa rua ne’e hodi lansa kontra atake ba malu ho agresivu no tama ba iha minutu 10 Evinho Guterres susesu fura rede Mauputar F.C dala ida tan, Mushila F.C haboot liu tan score ba 2-0.

Tama ba iha minutu 11, Mauputar F.C tenke halao jogu ho nain haat durante minutu rua nia laran, hafoin guarda rede prinsipal Mauputar F.C, Flavio hetan kartaun mean.

Menus Jogadór ida Mushila F.C tenta nafatin hodi bele aumenta golu, maibé tentativa oioin ne’ebé lansa hosi Mushila sedauk bele aproveita hodi sa’i golu durante minutu rua nia laran.

Mushila F.C foin marka golu iha minutu 16 liu hosi asaun Evinho Guterres ne’ebé susesu marka nia naran ba datoluk nia hodi haboot liu tan score ba 3-0.

Sofre ona golu tolu la hamate espiritu kompetitivu hosi Mauputar F.C nian hodi lansa kontra atake ba malu. Nunee tama ba iha minutu 39, Mauputar F.C konsege responde golu ida hodi hamihis score ba 3-1 liu hosi asaun Joice.

Ho score refere ekipa rua Mantein lansa kontra atake ba malu ho intensidade aas, maibé too termina jogu primeira parte score Mantein 3-1.

Kontinua ba jogu Segunda parte ekipa rua mantein lansa kontra atake ba malu ho intensidade aas. Hakat ba iha minutu 28, Mushila F.C haboot liu tan score ba 4-1 liu hosi Jogadór Joel Fernandes.

Iha minutu 29, Mauputar F.C konsege responde hikas golu ida hodi hamihis score ba 4-2 liu hosi asaun Subhan Faidasa hafoin simu asistensia hosi nia kompatriota Juan Alexa.

Ho score refere jogu kontinua manas liután. Ekipa Mauputar F.C ne’ebé sofre ona golu tenta halao jogu power play hodi buka hatama golu maibe tama ba iha minutu 37 kapitaun ekipa Mushila F.C Joel Fernandes susesu fura rede Mauputar F.C dala ida tan hodi hatuur score ba 5-2.

Ho score refere ekipa Mauputar F.C mantein halao jogu power play hodi buka oportunidade atu hatama golu, maibé too termina jogu Segunda parte score Mantein 5-2 vitória ba Mushila F.C hodi sai kampiaun ba Kopa AFTL  2026.

Kampiaun ba Kopa Asosiasaun Futsal Timor Leste (AFTL) 2026 ne’e hetan premiu osan ho montante US$5,000.00 inklui tasa.

Ekipa Mauputar F.C ne’ebé mak segundu lugar hetan osan ho montante US$3,000.00.

Mellor markadór Kopa AFTL 2026 monu ba jogadór Mauputar F.C, Subhan Faidasa ho golu hamutuk ualu (8), no hetan premiu osan ho montante US$500.00 inklui sapatu ouru no mellor Jogadór monu ba João Paulo Canizo, no iha direitu ba osan US$500.00 inklui ho tasa ida.

Jornalista: Davilio Valdemir/Editór: Vito Salvadór