AS Marka-Assalam F.C Fahe Pontu Hanesan iha Jogu Kontinuasaun Liga Timorense Époka 2026

Jogu kontinuasaun jornada da-ruak Liga Timorense Primeira Divizaun époka ne'e, AS Marka vs Assalam F.C iha Estádiu Munisipál Díli, Sábadu 13 Juñu 2026. Imajen/LFTL

Díli, 13 Juñu 2026 (RAFA.TL)- Ekipa AS Marka obrigadu tenke fahe pontu hanesan ho nia adversariu Assalam F.C hafoin empata ho score 2-2, iha jogu kontinuasaun jornada da-ruak Liga Timorense Primeira Divizaun époka 2026.

Iha  inísiu jogu ne’ebé hala’o iha Estádiu Munisipál Díli, Sábadu (13/06/2026), ekipa Assalam F.C hala’o kedas jogu ida agresivu ho intensidade aas hodi lansa atake maka’ás ba nia adversáriu AS Marka.

Tama ba iha minutu sia Assalam F.C konsege lidera uluk ho score 1-0 liu hosi jogadór Ricky Purnama. AS Marca mantein ho tátika ne’ebé iha, maibé hahú hadi’a liña kotuk hodi asegura ameasa sira husi adversáriu no lansa kedas kontra atake bainhira hetan oportunidade sira.

Ho esforsu ne’ebé iha, ekipa rua mantein ho score ne’ebé iha to’o tempu primeira parte termina.

Tama ba segunda parte, ekipa rua hasa’e liután intensidade jogu no halo  mudansa ba tátika ho mós halo substituisaun ba jogadór.

AS Marka domina bola liu hosi pasajen bola badak hosi ain ba ain, no tama ba iha minutu 46 liu hosi jogadór Oibo Godspaower  halo empata ba jogu no muda score sa’i  1-1.

Ho score refere tensi jogu komesa manas no tama ba iha minutu 53, AS Marka konsege lidera hikas liu hosi jogadór Celsio Santos hodi muda score ba 2-1.

Assalam F.C tenta sai husi presaun no mantein joga kalma hodi lansa kontra atake ba adversáriu AS Marka. Ho nune’e, tama ba minutu 65 Assalam F.C konsege marka tan golu ida hodi halo empata ho score 2-2 liu hosi jogador Norberto da Costa hafoin halo suta livre ne’ebé la konsege antisipa ho di’ak hosi guarda rede AS Marka.

Ho golu ne’e halo ekipa rua mantein ho score 2-2 to’o jogu segunda parte nian remata.

Jornalista: Marito da Costa/Vito Salvadór