Kopa Mundiál 2026, Kanadá no Bósnia-Herzegovina Empata ho Score 1-1

Jogadór sira selebra golu iha jogu entre Kanadá ho Bósnia-Herzegovina iha Kopa Mundiál 2026.

Díli, 13 Juñu 2026 (RAFA.TL)- Ekipa nasionál Kanadá ho Bósnia-Herzegovina fahe pontu hanesan hafoin empata ho score 1-1 iha jogu kontinuasaun Grupu B Kopa Mundiál 2026.

Jogu entre Kanadá hasoru Bósnia-Herzegovina hanesan jogu dahuluk ba Grupu B iha Estádiu Toronto, Sábadu (13/06/2026), no kanada mak hanesan uma-na’in.

Jogu hahú ekipa Kanadá domina jogu iha minutu dahuluk liu husi pasajen bola ne’ebé iha, maibé falla iha finalizasaun.

Jogadór sira Bósnia-Herzegovina ho fasil antesipa bolasira husi jogadór Kanadá hodi halo balansu ba jogu.

Ekipa rua mantein ho jogu no tátika ne´ebé iha hodi buka oportunidade atu lansa kontra atake ba malu, no Kanadá ne’ebé hanesan uma-na’in halo jogui ida agresivu, maibé nafatin falla iha parte finalizasaun tanba avansadu sira la aproveita oportunidade ho másimu.

Bósnia-Herzegovina ne´ebé mós aplika jogu ho ritmu lais halo kedas kontra atake bainhira iha oportunidade no sempre halo presaun ba Kanadá.

Ekipa Bósnia-Herzegovina hetan uluk  oportunidade iha minutu 21 hodi marka golu liu husi nia jogadór Jovo Lukic hodi muda score ba 1-0.

Kanadá iha oportunidade iha minutu 33, liu husi jogadór Tanitoluwa Oluwaseyi bainhira kontrola bola iha parte loos kaixa penalidade nian hafoin manán duelo ida ho defeza bósniu maibé sei falla iha finalizasaun tanba la kona alvu.

Kanadá kontinua halo presaun ba Bósnia, maibé pasajen sira ne’ebé ladi’ak no remata ne’ebé lakona alvu to’o primeira parte remata ho Bósnia iha lideransa.

Tama ba segunda parte, Kanadá kontinua fó presaun ba adversáriu. Jogadór Oluwaseyi nia suta hetan blokeiu husi guarda rede Bósnia.

Esforsu Kanadá nian fó rezultadu iha minutu 78, hafoin jogadór Promise David halo pasajen ida ba nia kompatriota Cyle Larin no lansaa suta ida ne’ebé dezvia hosi jogadór Bósniu nia satan no tama ba rede iha kantu loos no golu ne’e muda score ba 1-1.

Eksipa rua kontinua halo kontra atake ba malu, maibé score 1-1 mantein to’o jogu remata no ekipa rua obrigadu fahe pontu hanesan iha jogu ne’e hodi hein fali jogu tuir mai.

Ba Kanadá pontu ida ne’e nakonu ho istória tanba foin ba dala-uluk iha Kopa Mundiál Kánada rekolla pontu ida hafoin antes ne’e iha Kopa Mundiál 1986 iha Méxiku no 2022 iha Qatar ekipa Kánada la rekolla pontu husi jogu neen tanba sofre derrota hotu.

Kontinua asiste Kopa Mundiál 2026 iha NTV ka bele haré liuhosi TT Streaming iha http://tv.timortelecom.tl/

Jornalista: Davilio Valdemir/Editór: Vito Salvadór