Abertura Kopa Mundiál 2026, Uma-Na’in Méxiku Manan Áfrika-Súl ho Score 2-0

Raul Jimenez no Sibisi, Méxiku hasoru Áfrika-Súl. Tasa Mundiál 2026. Imajen/EPA

Díli, 12 Juñu 2026 (RAFA.TL)-Jogu abertura Kopa Mundiál 2026 entre uma-na’in Méxiku (El Tricolor) no Áfrika-Súl nakonu ho kartaun mean. Maski nune’e, El Tricolor konsege termina jogu ne’e ho vitóri no rekolla pontu tolu hodi lidera grupu A.

Jogu entre Méxiku ho Áfrika-Súl ne’ebé hala’o iha Estádiu Azteca, Sesta (12/06/2026), ekipa Méxiku ne’ebé lidera husi treinadór prinsipal Javier Aguirre manan nia adversáriu ho score 2-0 ho golu ne’ebé produz husi nia jogadór  Julian Quinones no Raul Jimenez.

Ho ritumu jogu intensidade as no ambisaun ne’e, Áfrika-Súl hetan desgrasa iha jogu ne’e, tanba nia jogadór Sphephelo Sithole no Themba Zwane, hetan kartaun mean hafoin komete falta sira ne’ebé fó risku ba adversáriu iha jogu ne´e.

Defeza Mexikanu Cesar Montes mós hetan kartaun mean, hafoin komete erru ne’ebé la fó vantajen di’ak ba jogu no ida-ne’e konserteza lakon ida ba Méxiku rasik hanesan uma-na’in tanba Cesar Montes hanesan jogadór prinsipal ba selesaun Mexikanu.

Méxiku hahú nia vitória ne’e iha minutu neen bainhira jogadór Afrika-Sul Sphephelo Sithole lakon kontrolu ba bola iha área penalidade oin no jogadór adversáriu Julian Quinones ne’ebé hetan oportunidade osan-mean ne´e konverte  ba golu.

Hafoin golu ne´e, ekipa selesaun nasionál Áfrika-Súl hahú ataka ho bola naruk balun. Hugo Broos nia ekipa halo tentativa oioin hodi dirije bola ba terseiru defeza Méxiku nian.

Guarda-rede Súl-Afrikanu Ronwen Williams halo salvasaun ida iha minutu 40, hodi hapara suta ida hosi Raul Jimenez.

Áfrika-Súl hetan redusaun ba jogadór ida tanba sofre kartaun mean no joga deit ho jogadór  na’in 10 iha segunda parte.

Sithole hetan kartaun mean ida tanba falta ida hasoru Brian Gutierrez, ne’ebé maka hasoru guarda-rede, iha minutu 49. Árbitru la fó penalidade ba Méxiku tanba falta refere akontese iha área grandeal liur.

Méxiku aumenta nia golu ba 2-0 iha minutu 67 liu husi jogadór estrella Raul Jimenez liu husi bola kruzamentu.

Ho golu husi Jimenez ne’e halo Áfrika-Súl kontinua sofre tanba nia jogadór Themba Zwane hetan akuzasaun ba falta ida tanba soke Roberto Alvarado, hafoin ne’e, nia hetan kartaun mean iha minutu 84 hafoin revizaun VAR nian.

Molok jogu termina, jogadór Méxiku Cesar Montes mós hetan kartaun mean iha tempu extra segunda parte nian no hetan expulsaun tanba halo falta ba Khuliso Mudau, no skor mantein 2-0 to’o jogu remata.

Lista jogadór

Méxiku (4-1-2-3): Raul Rangel; Israel Reyes, Cesar Montes, Johan Vasquez, Jesus Gallardo; Erik Lira, Brian Gutierrez, Alvaro Didalgo; Alvarado, Raul Jimenez, Julian Quinones.

Áfrika-Súl (5-3-2): Ronwen Williams; Khuliso Mudau, Nkosinathi Sibisi, Ime Okon, Mbekezeli Mbokazi, Aubrey Modiba; Teboho Mokoena, Sphephelo Sithole, Jayden Adams; Lyle Rayners, Iqraam Foster.

Bele asiste direta Kopa Mundiál tomak iha NTV ka bele haree liuhosi TT Streaming iha http://tv.timortelecom.tl/

Jornalista: Davilio Valdemir/Editór: Vito Salvadór