Kopa AFTL, São Francisco Xavier Asegura Billete Meia-Finál Hafoin Halakon Kablaki F.C ho Score 3-1

Jogu São Francisco Xavier vs Kablaki F.C

Díli, 09 Juñu 2026 (RAFA.TL)- Ekipa São Francisco Xavier susesu hakat ba Meia-Finál hafoin halakon nia adversáriu Kablaki F.C ho score 3-1 iha jogu kontinuasaun Kopa Asosiasaun Futsal Timor Leste (AFTL) faze eliminasaun Quartu Finais ne’ebe hala’o iha kampu futsal FALINTIL-Forsa Defeza de Timor Leste (F-FDTL) iha Dili, Segunda (08/06/2026).

Dezde kick off primera parte hahú, ekipa rua hotu hotu hatudu jogu furak iha kampu hodi atrai adeptu  hadomi futsal sira ne’ebé mak asiste direta iha jogu refere.

Ekipa São Francisco Xavier ne’ebe mak hatudu ritmu jogu di’ak konsege domina liu bola hodi lansa sutu fila-fila ba rede ekipa Kablaki F.C, nune’e tama ba iha minutu neen São Francisco Xavier susesu produs golu ida hodi lidera provizoriu ho score 1-0 liu hosi jogadór Lorenco Oliveira.

Ho score refere obriga ekipa Kablaki F.C hala’o jogu agresivu liu hosi kontra atake ne’ebé lais no tama ba iha minutu 19 ekipa Kablaki F.C konsege responde golu empata liu hosi asaun Eugenio Soares hodi hatuur score ba 1-1 to’o termina jogu priemeira parte.

Kontinua ba jogu Segunda parte ekipa rua hahu jogu ho kuidadu liu hosi lansa kontra atake ba malu ho ritmu ida-idak nia no buka oportundade atu aumenta tan golu no tama ba iha minutu 37 São Francisco Xavier susesu produs tan golu ida hodi lidera hikas ho score 2-1 liu hosi jogadór Sercandio Barbosa.

Ho score refere jogu kontinua manas liután ba ekipa rua hodi lansa kontra atake ba malu no tama ba iha minutu 38 São Francisco Xavier haboot liu tan score ba 3-1 liu hosi Juaqim Amaral to’o termina jogu Segunda parte vitoria ba São Francisco Xavier.

Hosi rezulatadu vitória ne’e lori ekipa São Francisco Xavier hakat ba Meias Finais Kopa AFTL 2026, enkuantu ekipa Kablaki F.C obrigadu tenke elimina hosi eventu refere tanba jogu ne’e ho  sistema bota fora ka lakon sai.

Jornalista: David Gonçalves/Editór: Vito Salvadór