AD Santo António Halakon Nia Adversáriu Nagardjo F.C ho Score Mihis 3-2

Ekipa Santo António. Imajen/Liga Timorense

Díli, 06 Juñu 2026( RAFA.TL)- Jogu kontinuasaun Liga Futeból Timor-Leste (LFTL) segunda divizaun, grupu A, ekipa AD Santo António halakon nia adversáriu Nagardjo F.C ho score mihis 3-2.

Jogu ne’ebé hala’o iha Estádiu Munisipál Díli, Sábadu (06/06/2026), ekipa rua ho ambisaun hanesan hakarak konkista vitória hodi hadau oportunidade ba lidera tabela klasifikasaun grupu A.

Iha jogu primeira parte ekipa rua tun kedas ho ritmu jogu ne’ebé hanesan hodi lansa kontra atake ba malu, nune’e tama minutu ualu (8) Nagardjo F.C hetan uluk oportunidade hodi marka golu ba adversáriu liu husi jogadór Richi Wally hodi muda score ba 1-0.

Ho score ne’e AD Santo António koko muda estratéjia jogu no tenta atu marka golu, maibé la konsege tanba defeza husi Nagardjo F.C nian maioria la fó fatin atu ultrasapasa.

Jogu kontinua manas liután no Nagardjo F.C Kontinua aproveita tempu no muda estratejia jogu no aumenta tan golu ida ba adversáriu AD Santo António liu husi jogadór Herman Yoku iha minutu 16 hodi muda score ba 2-0.

Jogu kontinua ho intensidade aas, nune’e tama ba minutu 43 jogadór Nagardjo F.C Bernardino de Sena halo auto golu ba nia rede no ho golu ne’e halo AD Santo António hetan golu ida no score muda ba 1-2 to’o primeira parte termina ekipa Nagardjo F.C kontinua lidera.

Tama ba segunda parte, AD Santo António ho ambisaun boot tenta fó presaun ba Nagardjo F.C ho estratejia ne’ebé iha, no ikus mai tama ba minutu 63 jogadór Emmanuel Ghannaian  marka golu ida tan ba ekipa AD Santo António hodi halo score 2-2.

Liu deit minutu ida, no tama ba minutu 64, AD Santo António hetan penalidade ida no jogadór seniór Silveiro Garcia susesu ezekuta no marka golu hodi muda score ba 3-2, no golu ne’e halo AD Santo António lidera hikas jogu.

Ekipa Nagardjo F.C kontinua halo tentativa atu halo empata, maibé ekipa AD Santo António mantein hatudu nia superioridade hodi kontinua mantein score ne’ebé iha to’o tempu remata segunda parte nian.

Ho vitória ne’e, ekipa AD Santo António lidera provizoriu tabela klasifikasaun grupu A no iha oportunidade boot promovidu ba primeira divizaun iha époka oin.

Jornalista: David Gonçalves/Editór: Vito Salvadór