AD Santo António Halakon As Ponta Leste ho Score 4-0

Ekipa AD Santo António halakon As Ponta Leste ho score 4-0 iha kontinuasaun Segunda Divizaun Grupu A, Liga Timorense époka 2026 iha Estádiu Munisipál Díli, Tersa 02 Juñu 2026.

Díli, 03 Juñu 2026 (RAFA.TL)- Jogu kontinuasaun Segunda Divizaun  Grupu A, Liga Timorense époka 2026,  AD Santo António halakon nia adversáriu As Ponta Leste  ho score  4-0.

Iha jogu ne’ebé hala’o iha Estádiu Munisipál Díli, Tersa (02/06/2026), ekipa AD Santo António utiliza ritmu jogu ho kalma hodi estuda adversáriu jogu no haré oportunidade atu lansa atake liu husi sira-nia tátika.

Ekipa AD Santo António ne’ebé treina husi eis-treinadór AS Ponta Leste, Eduardu Pereira no maioria jogadór iha AD Santo António mai husi AS Ponta Leste, nune’e ekipa rua familiár los.

AD Santo António kuaze hatene saida mak sira sei halo atu halakon sira nia adverasáriu neébé hanesan mós sira nia klubu anteriór.

Ekipa AS ponta Leste iha ambisaun hakarak konkista vitóri ahafoin iha jogu rua antes sofre derota halo jogu ida lais ho kontra atake, maibé sei falla iha ezekusaun sira no adversáriu mantein ho jogu ida rapidu hodi la fó oportuinidade atu AS Ponta Leste marka golu.

AD Santo António halo esforsu liu husi kontra atake ne’ebé iha no tama ba minutu 19 konsege marka golu ida liu husi jogadór Olegar Xavier hodi Lori AD Santo António lidera score 1-0.

Ekipa rua kontinua lansa kontra atake, maibé tama ba minutu 35 AD Santo António marka tan golu ida liu husi jogadór Abril da Costa hodi muda score ba 2-0.

Hafoin golu ne´e ekipa AS Ponta Leste konsege halo balansu ba jogu hodi lansa mós kontra atake no halo sutu maka’ás ba guarda rede adversáriu, maibé sei falla iha finalizasaun.

Ekipa AD Santo António marka tan golu ida iha minutu 45+1 liu husi jogadór Abril da Costa hodi muda score ba 3-0 no golu ne’e mak hakotu jogu primeira parte.

Kontinua ba segunda parte, ekipa AS Ponta Leste hahú halo substituisaun ba jogadór sira no halo esforsu másimu hodi buka atu hatama golu, maibé sei nafatin falla tanba ekipa adversáriu la fó oportunidade.

Ekipa AD Santo António aumenta tan golu ba da-haat iha minutu 67 liu husi jogadór Emmanuel Ganaian hodi muda score ba 4-0.

Maske derota golu haat, maibé AS Ponta Leste nafatin iha esperansa atu kontinua halo kontra atake ba ekipa Santo António, no konsege hetan oportunidade osan mean ida liu husi penalidade ne’ebé iha  maibé falla iha ezekusaun.

Ekipa rua kontinua hatudu sira nia produtividade jogu no lansa kontra atake ba malu maka’ás, maibé laiha golu ida mak akontese to’o jogu termina.

Tuir orariu jogu Liga Timorense segunda divizaun, ekipa Academica F:C sei hasoru Lica Lica Lemorai F:C no Fiel F.C hasoru Nagardjo F.C, iha Estádiu Munisipál Díli, Kuarta (03/06/2026).

Jornalista: Marito da Costa/Editór: Vito Salvadór