Kopa AFTL Grupu F, Maudoko F.C Halakon AS Jerman ho Score 5-0

Maudoko F.C manan AS Jerman ho score 5-0 iha jogu kontinuasaun Kopa Asosiasaun Futsal Timor Leste (AFTL) 2026 faze apuramntu grupu F, Kinta (28/05/2026). Imajen/AFTL

Díli, 29 Maiu 2026 (Rafa.tl)- Maudoko F.C susesu halakon nia adversáriu AS Jerman ho score 5-0 iha jogu kontinuasaun Kopa Asosiasaun Futsal Timor Leste (AFTL) 2026 faze apuramntu grupu F.

Jogu ne’ebé hala’o iha kampu Futsal Kuartel Jerál F-FDTL, Fatuhada, Díli, Kinta (28/05/2026), ekipa Maudoko F.C ne’ebé reforsa mós hosi jogadór estranjeiru na’in-ida konsege domina liu bola no fó presaun ba liña defeza As Jerman nian liuhosi kombinasaun atake ne’ebé lalais ho nune’e jogu foin hala’o minutu haat Verito Fragozo susesu fura rede AS Jerman hodi lori nia ekipa Maudoko F.C lidera provizoriu ho score 1-0.

Ho score refere halo ekipa Maudoko F.C hala’o jogu ho agresivu liután no tama ba iha minutu neen jogador estranjeiru Maudoko F.C Dewa Henuk aumenta tan golu ida hodi hatuur score ba 2-0.

Ho golu ne’e obriga ekipa As Jerman tenke hala’o jogu ho ofensivu hodi lansa kontra atake no buka oportundade atu produs golu, maibé ekipa Maudoko F.C aproveita hodi halo kontra atake ne’ebé lais hodi produs tan golu ida liu hosi jogadór Ivanildo Rangel hodi aumenta score ba 3-0.

Ho score refere halo jogu kontinuasaun manas liután ba ekipa rua ne’e hodi lansa kontra atake ba malu, maibe to’o termina jogu priemeira parte score  mantein 3-0.

Kontinua ba jogu segunda parte AS Jerman ne’ebé mak sofre ona golu tolu iha priemeira parte tenta halo jogu ofensivu hodi buka oportundade atu bele produs golu, maibé tama ba iha minutu 24 Maudoko FC haboot liu tan score ba 4-0 liu hosi jogador Gilson Correia.

Iha minutu 29 jogador estranjeiru Maudoko FC Dewa Henuk marka tan golu hodi haboot liu tan score sai 5-0, no score mantein la muda to’o termina jogu segunda parte vitória ba Maudoko FC.

Hosi vitória ne’e lori ekipa Maudoko FC ukun provizoriu tabela klasifikasaun group F ho pontu tolu  (3) enkuantu ekipa AS Jerman iha pozisaun ikus liu ho pontus  zero (0).

Iha group (F) kompostu hosi ekipa tolu hanesan Maudoko FC, As Jerman no Lorico FC.

Jornalista: Davilio Valdameir/Editór: Vito Salvadór