Liga Timorense Segunda Divizaun, AC Mamura Manan Academica F.C ho Skor 2-1

Adeptu sira AC Mamura, Bairu-Pité, Díli asiste sira-nia ekipa favoritu joga kontra Academica F.C iha Estádiu Munisipál Díli, Tersa (26/05/2026).

Díli, 27 Maiu 2026 (RAFA.tl)- Ekipa estimadu komunidade Mamura, Suku Bairu-Pite, Díli, AC Mamura ne’ebé foin mak promovidu husi terseira divizaun susesu halakon nia adversáriu Academica F.C ho skor 2-1.

Jogu entre AC Mamura no Academica F.C ne’ebé hala’o iha Estádiu Munisipál, Díli, Tersa (26/05/2026), lori euforia ida diferente tanba ekipa rua nunka hasoru malu iha liga Timorense époka sira antes ne’e tanba AC Mamura foin promovidu husi terseira divizaun no Academica F.C hanesan klubu ne’ebé iha esperiénsia barak iha Liga profesionál tanba foin mak degradadu husi primeiru divizaun iha époka kotuk.

Iha primeiru parte ekipa rua tun ho performa ne’ebé nakonu ho animu no ekipa rua lansa kedas kontra atake ba malu liu husi tátika ne’ebé iha.

Tama ba minutu 23 ekipa promovidu AC Mamura marka uluk golu ida iha minutu 23 liu husi jogagor avansadu Wolter Klau hodi muda skor ba 1-0.

Ekipa AC Mamura kontinua domina jogu iha liña klaran no halo kontra atake ho avansadu rua ne’ebé lais no halo defeza Academica F.C tenke servisu estra hodi defende nia guarda-rede husi amiasa sira.

Tama ba minutu 43 AC Mamura liu husi nia jogador Deliviu Lobo marka tan golu ida hodi muda skor ba 2-0 no primeira parte termina ho vitória ba AC Mamura.

Tama ba segunda parte, ekipa Academica F.C hahú halo mudansa ba jogadór sira no hahú implementa estratejia oinsá halo kontra lais hodi duni derota ne’ebé iha no hametin liña defeza hodi fó presaun ba AC Mamura.

Tama ba minutu 55 jogadór Academica F.C, Sonny Aplunggi konsege marka golu ida hodi hamihis skor ba 1-2.

Ekipa rua kontinua halo jogu ida ho intensidade às, maibé la rezultadu tan golu ruma nune’e ekipa AC Mamura susesu rekolla pontu tolu no Academica F.C obrigadu tenke fila ho liman mamuk.

Iha intervista Treinadór AC Mamura, Edi Fernandes hatete, vitória ne’ebé iha tanba jogadór sira halo tuir orientasaun durante treinu no nia parte sei halo preparasaun di’ak liután hodi hasoru ekipa Lica Lica Lemorai F.C iha jogu tuir mai.

“Ita hotu hatene katak AC Mamura ne’e klubu ida foin promevidu husi terseiru divizaun,  ohin, ami promevidu mai sigundu divizaun, ami nia jogu primeiru hasoru kedas ekipa zigante, ekipa ne’ebé kleur ona (Academika), maibé ami tenta no ohin hetan duni  pontu tolu,” Edi Fernandes hateten.

“Ami fó fiar ba ami nia jogador sira no implementa duni saida mak durante ami treinu. Domingu agora ami joga, ami sei iha Loron rua hodi halo preparasaun, hodi hasoru ekipa Lica Lica,” Edi Fernandes tenik.

Treinador Academica F.C, Luzinho dos Santos apresia performa husi ekipa AC Mamura no rekoñese nia parte falla iha liña defeza, nune’e adversáriu fasil atu lansa atake ne’ebé ikus mai rezulta golu sira.

“Ekipa Mamura sira mós ekipa diak, mézmu sira foin promevidu, maibé sira nia preparasaun di’ak, no ami mós iha oportunidade barak hodi hatama golu, maibé oportunidade ne’e ami la aproveita di’ak,” Luzinho dos Santos informa.

Tuir oráriu Liga Timorense segundu divizaun ba Kuarta (27/05/2026),  Lica Lica Lemorai F.C sei hasoru Hibers Díli F.C no Nagardjo F.C sei hasoru As Ponta Leste iha Estádiou Munisipál Díli.

Jornalista : Marito da Costa/Editór: Vito Salvadór