Jogu Abertura Liga Timorense Époka 2026, Karketu Díli F.C Rekolla Vitória Da-huluk Kontra As Marca ho Skor 4-2

Imajen/LFTL

Díli, 21 Maiu 2026 (RAFA.tl)- Liga Timorense époka 2026 hahú ho jogu prestíjiu entre ekipa Matak Malirin (Karketu Díli F.C) kontra As Marca. Iha jogu ne’ebé hala’o iha Estádiu Munisipál Díli ne’e, Karketu Díli F.C rekolla vitória da-huluk hodi halakon As Marca ho skor 4-2.

Liga Futeból Timor-Leste (LFTL), hahú hikas nia jornada ba époka tinan ne’e no jogu sira ne’ebé komisaun planeia sei harame no fó animasaun ba adeptu futeból sira ne’ebé ba asiste direta iha Estádiu Munisipál Díli .

Jogu abertura ne’ebé halao husi Karketu Díli F.C no As Marca ne’e, kapas no kuaze ekipa rua hatudu jogu ida ho kualidade tuir preparasaun ekipa nian.

Iha primeira parte jogu hahú, ekipa Karketu Díli F.C  jogu ho intensidade tuir ritmu no orientasaun ne’ebé ekipa tékniku fó molok joga.

As Marca ne’ebé iha ambisaun atu rekolla vitória iha jogu da-huluk halo kedas kontra atake no aproveita fallansu ne’ebé adversáriu iha hodi marka kedas golu Ida iha minutu neen (6), liuhusi jogadór Ezaquel da Cruz hodi muda skor ba 1-0.

Karketu Díli F.C ne’ebé sofre golu uluk, nafatin iha ispiritu hodi duni derrota ne’ebé iha, no hasae intensidade jogu hodi lansa atake ba  As Marca.

Maske nune’e As Marca kontinua lansa tan ameasa ida liu husi kombinasaun entre jogadór sira iha liña klaran no avansadu ne’ebé hatudu jogu diak tebes.

Haré ba ameasa hirak ne’e, Karketu Díli F.C  halo mudansa ba tatika iha liña klaran no tama ba minutu 39 Karketu Díli F.C konsege marka golu ida hodi muda skor ba 1-1 liuhusi jogador Daniel Gayo hafoin simu asisténsia husi Anzenuku.

Liu deit minutu tolu no tama ba minutu 41 Karketu Díli F.C aumenta tan golu Ida liu husi jogadór estranjeiru Daniel Gayo hodi muda skor ba 2-1. Ekipa rua mantein ho skor ne’ebé iha too primeira parte termina.

Tama ba segunda parte, As Marca halo kedas substituisaun ba jogadór iha liña avansadu no meiu kampu jodi hasa’e ritmu jogu atu buka halo empata no buka oportunidade hodi bele rekolla vitória.

Karketu Díli F.C marka tan golu da-toluk iha minutu 65 liu husi jogadór Anzenuku hodi muda skor ba 3-1.

As Marca maske sofre golu tolu ona, jogadór sira nafatin halo esforsu, no tama ba minutu 74 jogadór As Marca Gabriel Pires marka golu Ida ba nia ekopa liu husi bola kabesada hodi muda skor ba 2-3.

Jogadór As Marca nafatin iha animu hodi halo jogu maibé Karketu Díli F.C  halo mudansa iha liña klaran no área defeza hodi hasa’e liután intensidade, nune’e tama ba minutu 89 jogadór Anzenuku marka tan golu Ida hodi muda skor ba 4-2.

To’o jogu termina ekipa Karketu Díli F.C mantein lidera ho skor 4-2 hodi rekolla pontu tolu enkuantu As Marca tenke fila ho derrota no lahetan pontus iha jogu da-huluk.

Treinadór As Marca, José Carlos Fonseca  afirma, maske lakon maibé hanesan treinadór sei prepara ekipa di’ak liután ba jogu sira tuir mai hodi bele hetan vitória.

“Ohin, primeiru jogu abertura Ida ne’e hasoru direita ekipa zigante ne’e di’ak tebes. Mai ami ba jogu tuir mai tamba ami bele organiza no iha preparasaun di’ak liután ba jogu tuir mai iha loron 13 fulan-Juñu ne’e,” José Carlos Fonseca hateten.

Treinador Karketu Díli F.C,  Bernard Teye hateten maske iha primeira parte jogadór sira joga la tuir esetativa, maibé konsege mellora iha segunda parte no rekolla vitória iha jogu da-huluk no ida ne’e importante ba ekipa iha jogu sira tuir mai.

“Ne’e jogu di’ak ida, teste di’ak ida, no ha’u nia jogador sira organizadu. Ami kumpri ami nia instrusaun sira no depois ami fó deskansa ba sira. Entaun ami fila-fali no hadi’a ami nia sala sira, depois bainhira liga la’o ba oin ha’u fiar katak ami nia dezempeñu sei hadi’a,” n Bernard Teye hateten.

Treinadór ne’e subliña golu ne’ebá adversáriu marka ba sira tanba deit falta komunikasaun entre jogadór sira, liuliu guarda-rede no konsege hadi’a kedas iha jogu ne’e.

Tuir orariu Liga Timorense époka ne’e, Sesta (22/05/2026) sei iha jogu rua; A.D S.L.B Laulara sei kontra Assalam F.C no D.I.T F.C sei hasoru Santa Cruz F.C iha Estádiu Munisipál Díli.

Jornalista: Marito da Costa/Editór: Vito Salvadór