GOTA ho Nine Indústria Sai Primeiru Lugar Ba Kompetisaun Futsal ETO Cup 2026

ekipa mane GOTA primeiru lugar iha kompetisaun jogu Futsal ETO Cup 2026.

Díli, 11 Maiu 2026 (RAFA.TL)- Komemora loron mundiál Traballadór (May Day) 2026,  Empreza Grupu Esperança Timor Oan (ETO) realiza atividade desportiva oin-oin liu-liu ba modalidade Futsal ba kolaboradór (Traballadór) empreza subsidiária sira hodi kompete no ekipa mane husi GOTA hetan primeiru lugar no ba Feto kampiaun husi Nine Indústria.

Kompetisaun ne’ebé hala’o durante semana ida ne’e hetan partisipasaun masímu husi kolaboradór empreza oan sira grupu ETO nian hamutuk 18 kompostu husi feto ekipa 7 no mane ekipa 11.

Durante kompetisaun ekipa hotu ativu no animadu hodi kompete tuir espíritu maun-alin nian hodi hametin kooperasaun no amizade hanesan família boot ETO-Group.

Iha kompetisaun ne’e ekipa mane GOTA primeiru lugar no ETO-TELCO hetan segundu lugar no ekipa feto Nine Indústria hetan primeiru lugar no segundu lugar monu ba ekipa Dtile.

Prémiu ba primeiru lugar jogu Futsal ekipa primeiru lugar mane no feto hetan prémiu osan ho montante $2000 kada ekipa ho medalla no segundu lugar kada ekipa hetan $1500 ho medalla.

CEO ETO-Group, Nilton Telmo Gusmão do Santos, iha kalan reflesaun no komemorasaun loron mundiál traballadór, iha Tokoluli-Gleno, Sábadu (09/05/2026) hato’o, parabeniza ekipa manán na’in sira, ekipa hotu ne’ebé priense ona atividade desportu ne’ebé realiza.

“Aproveita mós hakarak kongratula empreza oan sira ne’ebé sai kampiaun ba ita nia jogu futsal. Gota manán, depois de primeira parte ETO Telco mak lidera hela, maibé ba segunda parte Gota mak sai tiha kampiaun hodi manán, ne’e mane. Feto Nine indústria. Portantu parabéns ba ekipa rua kampiaun, ba segundu kampiaun, terseiru, kuartu,” Nilton Telmo Gusmão dos Santos hateten.

Nia hatutan, liu husi sakrifísiu no prosesu tomak ohin loron Grupu ETO hamrík hanesan grupu ne’ebé organizadu no bele diversifika ba setór bar-barak.

“Agradese dala ida tan ita nia prezensa hotu mai hamutuk iha ne’e hodi festeza  ita nia loron, ita hotu nia loron, tanba ita hotu tenke fó ita nia enerjia, ita nia kosar, ita liman ita nia hanoin, ita nia tempu, maka ohin ita haré grupu ida ne’ebé ita konsidera bem estabelesidu iha ita nia rai, nia mai to’o nível ida ne’e, liu husi prosesu naruk ida, husi buat ne’ebé ki’ik liu, ha’u la haluha kuandu bainhira ha’u hahú atividades ne’e,  se mak apóia barak liu, mak organizasaun naun-governamental ida ne’ebe lidera husi ha’u nia aman rasik fundasaun ETADEP, Saudozu Gilman Exposto dos Santos,   sira mak ha’u nia primeiru kliente, sira mak ha’u nia primeiru organizasaun ne’ebe  fó fundu hodi ha’u hahú atividades ne’ebé la’o to’o ohin hodi konsentra iha ne’ebé hodi diversifika ba iha setór bar-barak,” Nia subliña.

Iha komemorasaun loron mundiál ba  traballadór ne’e, grupu ETO  realiza  kompetisaun jogu futsal ba grupu ETO kompostu husi, ETO Central ekipa Feto no mane, Nine Indústria feto no mane,  KTON feto no mane, Gota feto no mane, G&S mane, ETO Hera mane, ETO Telco feto no mane, ETO Balide mane,  Dtile feto no mane, ETO Tibar feto no mane, ETO Fatuhada mane.

Jornalista: Marito da Costa/Editór: Vito Salvadór