Karketu Díli F.C Hahú Halo Transferénsia no Kontratu Jogadór Ba Liga Timorense Époka 2026

Prezidente Karketu Díli F.C, Luís de Oliveira. Imajen/Rafa.tl

Díli, 11 Maiu 2026 (RAFA.TL)- Karketu Díli F.C ne’ebé ho naran estimadu Matak Malirin hahú halo preparasaun liu husi transferénsia no kontratu ho jogadór sira tantu nasionál no estranjeiru hodi kompete iha Liga Timorense époka 2026.

Notísia Relevante: LFTL ho Klubu Primeira No Segunda Divizaun iha Ona Konkordánsia Ba Liga Timorense Époka 2026

Ho ambisaun no mehi ba kampiaun liga Timorense époka ne’e, Karketu Díli F.C hahú asegura ona jogadór estrela sira hanesan Zenivio Mota, Anzenuku, Mouzinho de Lima, Natalino da Costa, Novelito no mos jogadór nasionál sira seluk ne’ebé antes ne’e reforsa ona Karketu Díli F.C iha époka sira antes no mós iha Taça da Liga FFTL.

Além de jogadór nasionál Karketu Díli F.C mós halo rekrutamentu ba jogadór estranjeiru lubuk ida hanesan Muhamad Mumin, Kurniawan, Carlinhos, Israel no mós Tafinha.

Prezidente Karketu Díli F.C, Luís Oliveira ba Rafa.tl Sesta (08/05/2026) hatete, hafoin Orgaun Liga Futeból Timor-Leste (LFTL), loke janela transferénsia époka ne’e, ekipa Karketu Díli F.C hahú halo kedas transferénsia no kontratu jogadór estrela balun ne’ebé dau-daun ne’e hala’o nia jogu iha Diáspora Zenivio Mota ne’ebé joga iha Singapura no mós Anzenuku ne’ebé antes ne’e reforsa Emmanuel F.C ho mós jogadór estranjeiru balun.

“Karketu mantein kontratu ho jogadór antigu na’in-lima, no halo kontratu foun ho jogadór lokal no estranjeiru, ami konsege atinji ona 95%. Ohin, ami sei finaliza, nune’e hein ba hatama lista jogadór ba LFTL, tanba aban loron ikus, Karketu konsege lobi jogadór estrela Timoroan ida ne’ebé dau-daun joga hela iha Singapura, Zenivio Mota, ne’ebé sei mai haforsa Karketu iha LFTL époka 2026,” Prezidente Karketu Díli F.C, Luís Oliveira informa.

Nia hatutan, alende halo transferénsia no kontratu ba jogadór sira, ekipa  Karketu Díli F.C mos obrigadu tenke husik nia jogadór estrela na’in-rua hanesan Anizio Coreia ho Kaka Malik Xavier ne’ebé sei reforsa ekipa AD Santo António iha segunda divizaun époka ne’e.

“Estrela jogadór na’in-rua ne’ebé durante ne’e hamutuk ho Karketu ami tenke husik, tanba sira nia futuru entaun sira ba haforsa klubu segunda divizaun Santo António. Karketu desde uluk bainhira ami halo kontratu ho jogadór, nunka iha point ida katak nia tenke joga ho klubu ne’e to’o liga remata, ida ne’e lae, karik iha jogu nia laran klubu balun husi estranjeiru hakarak atu kontratu nia ami fo livre no la afeita,” tenik Luís Oliveira.

Iha bursa transferénsia jogadór époka ne’e, ekipa Matak Malirin kontinua mantein kontratu ho jogadór estrela balu hanesan, Daniel Gayo, Corsino Lemos, Tiago no Nelson Viegas.

Aleinde ne’e, Karketu Díli F.C mos halo despedida ho jogadór senior Angiso Barbosa ne’ebé sei ba reforsa HIBERS DÍLI F.C no husik mos Jogadór Egy Calapes ho Fonseca ne’ebé sei ba reforsa klubu seluk iha sira nia kareira profisionál.

Jornalista : Marito da Costa/Editór: Vito Salvadór