Delegasaun Ministru Edukasaun CPLP Visita ESG 04 de Setembro UNAMET

Delegasaun Ministru Edukasaun CPLP vizita Eskola 04 de Setembru UNAMET, Díli, 7 Maiu 2026.

Díli, 08 Maiu 2026 (RAFA.TL)- Delegasaun Ministru Edukasaun sira husi Comunidade dos Países de Língua Portuguesa (CPLP), hamutuk ho sekretariadu, Kinta (07/05/2026),  vizita Eskola Ensinu Sekundária Jerál (ESG, sigla portugés), 04 de Setembru UNAMET, Díli, hodi haré direta kondisaun infraestrutura no situasaun sira liga ho prosesu aprendizajen no prátika lian Portugés ne’ebé mos hanesan lian ofisiál Timor-Leste nian.

Delegasaun ofisiál sira Ministru Edukasaun CPL to’o iha resintu ESG 04 de Setembru UNAMET Díli iha oras tuku 16:00 otl, no simu direta husi estudante no dirijente sira eskola nian hamutuk ho manorin na’in sira, hafoin ne’e iha mós aprezentasaun poezia ho lian Portugés no dansa kultura.

Tuir observasaun  Rafa.tl  nian iha eskolaa refere nota katak delegasaun CPLP sira halo de’it observasaun direta no iha konversa sira ho manorin na’in hira liu-liu Diretór  Eskola no hafoin ne’e delegasaun ne’e kontinua husik fatin refere hodi kontinua atividade seluk tuir ajenda sira ne’ebé marka ona.

Diretór Eskola 04 de Setembru UNAMET Díli, Sérgio Alfredo da Cruz, ba jornalista sira hatete, objetivu husi vizita ida ne’e maka atu observa no haré estudante sira nia partisipasaun iha ensinu de aprendizajen no mos vizita profesór sira hotu iha eskola 04 de Setembru, tanba eskola ne’e hola parte iha amigu da CPLP.

Nia afirma, iha sorumutu ne’e parte eskola nian aprezenta kona-bá realidade ne’ebé eskola sira iha Timor-Leste enfrenta, liu-liu hanesan eskola públiku hotu-hotu hasoru, liga ho fasilidade no rekursu sira, dalabarak mos susar atu kontrola estudante sira tamba ema barak liu kompara ho eskola privadu sira.

‘’Estudante kada turma ne’e difísil para profesór sira atu akompaña kona-bá labarik sira nia komunikasaun ho lian Portugés entre estudante ho manorin sira, ida ne’e maka difísil mais la hotu-hotu,  ida rua sikat iha estudante sira nia leet,’’ Sérgio Alfredo da Cruz hateten.

Diretór ne’e rekoñese katak, dalaruma estudante sira susar atu komunika ho lian Portugés iha ambiente eskola, maibé sempre hetan valor di’ak iha ezame períodu sira no mos iha ezame nasionál, tanba sira foku de’it ba iha ezame sira no la tau importánsia lor-loron iha aula laran.

Sérgio mos husu ba estudante iha eskola públiku sira, tenke estuda no aprende barak, halo mos tradusaun ba lian Portugés liu husi aplikasaun google, tenke sosa disionário hodi lee atu nune’e bele ko’alia lian Portugés ho di’ak.

Manorin na’in ne’e mos husu atu inan aman sira hanesan edukadór dahuluk iha família kontinua tau matan ba oan sira nia prosesu aprendizajen no hatoman sira estuda iha uma no prátika mos lian Portugés liu husi fasilita oan sira asesu ba lee livru Portugés sira, aprende husi Internet no meiu seluk tamba ohin loron teknolojia oferese buat hotu.

“Husu mos ba inan-aman sira, enkoraja mos oan sira hodi sai matenek, hodi bele ko’alia no hakerek lian Portugues ho di’ak,” tenik Diretór ne’e.

Iha ámbitu vizita delegasaun Ministru Edukasaun sira husi CPLP ne’e, estudante no manorin na’in sira ho entuziasmu simu delegasaun sira no parte  eskola mós aprezenta kona-bá naran eskola ne’ebé hanaran 04 de Setembru UNAMET  tanba iha ligasaun ho loron istóriku anúnsiu rezultadu konsulta popular Timor-Leste  iha loron 04  Setembru 1999 naran UNAMET tanba eskola refere uluk iha tinan 1999 utiliza ba fatin servisu Misaun Nasoins Unidas iha Timor Leste ka UNAMET.

Jornalista : Remígia Locatelli/Editór: Vito Salvadór