FEKATIL Realiza Kampionatu Nasionál “Xanana Cup 2026” Ba Klase Senior

Kompetisaun Nasionál Karate-do “Xanana Cup 2026”

Díli, 17 Abríl 2026 (RAFA.tl)- Federasaun Karate-do Timor-Leste (FEKATIL) realiza eventu kampionatu nasionál Karate-do “Xanana Cup 2026” ba klase senior hodi repara atleta sira ba kompetisaun rejionál no internasionál bainhira Timor-Leste hetan oportunidade atu ba kompete.

Diretór Jerál Desportu iha Ministériu Juventude Desportu Arte no Kultura (MJDK), João Rodrigues ba jornalista sira iha Ginásio Desportu Díli (GDD), Sesta (17/04/2026), informa Karate-do hanesan modalidade desportu ne’ebé tama ona ba planu IX Governu Konstitusionál nian, nune’e governu iha dever fó sira nia apóiu hodi eleva no prepara atleta sira liu husi eventu ne’e hodi kompete iha nível internasionál sira ne’ebé sei mai.

Nia hatutan tinan ida ne’e Governu apóiu US$70,000.00 ba Karate-do hodi hala’o atividade ba junior no mós ba senior no Governu agradese ba FEKATIL konsege envolve la’os de’it iha Díli, maibé konsege envolve mós atleta sira husi Munisípiu mai partisipa mós iha ne’e.

Husi senior ne’e sira halo selesaun ona ba tinan ida ne’e, aumezmu tempu halo preparasaun ba tempu naruk oituan para projeta ba ASEAN Games iha Malázia.

“Ita hotu iha esperansa hakarak ba hetan buat ruma, maibé ita hotu tenke hatene la’os ita de’it mak halo preparasaun, ita nia país Estadu membru  ASEAN sira mós halo preparasaun, agora depende ba kada preparasaun, ezemplu Timor-Leste, ita tenke fokus liu, prepara di’aklLiu no treinu maka’as liután, eleva ita nia kapasidade, la’ós de’it ba atleta maibé ba treinadór sira atu nune’e ita hetan atleta di’ak, tenke eleva kapasidade treinadór sira ho nível kualifikasaun di’ak hanesan ho Estadu membru ASEAN sira para sira mos hasa’e prestasaun ita nian,” João Rodrigues hateten.

Iha fatin hanesan, Sekretáriu Jerál FEKATIL,  António Carlos de Araújo agradese ba Governu tanba tau mós prioridade ba modalidade karate-do hodi apóiu finansiamentu ne’ebé boot ba realizasaun eventu tinan ida-ne’e.

Nia hatutan objetivu husi kampionatu ne’e federasaun atu haré atleta ne’ebé mak prestasaun di’ak, ne’ebé kampiaun iha eventu ne’e, nune’e bele prepara ba eventu internasionál sira.

“Agradese tanba Governu tau prioridade ba Karate-do, tinan ne’e aloka orsamentu ne’ebé boot tebes mai ami,” António Carlos de Araújo hateten.

Sekretáriu Jerál informa premium mak medalla ne’ebé iha ona, segundu mak orsamentu. Kategoria  ne’e ezemplu iha junior tanba ho ezijénsia Ministériu, katak karate-do mos tenke hahú ona ho jurus ka katar, agora dau-daun ne’e senior nian maibé katar ne’e ba junior.

Kompetisaun Nasionál Karate-do “Xanana Cup 2026” fahe ba klase 10, feto hahú husi kilograma  48,  53, 55, 61 no kilograma 68 Aleinde ne’e mane hahú husi kilograma 50, 55, 60, 67  no menus 75.

Iha kampionatu nasionál ne’e klubu hamutuk  14  no Atleta  168, kompostu husi feto 84 ho Mane 84 ne’ebé reprezentante husi Munisípiu Aileu, Ainaro, Liquiça, Bobonaro, Covalima, Viqueque, Lautém, Ermera, Díli A, Díli B no Díli C no Ekipa Nasionál FEKATIL A no B.

Jornalista: Marito da Costa/Editór: Vito Salvadór