LFTL ho Klubu Primeira No Segunda Divizaun iha Ona Konkordánsia Ba Liga Timorense Époka 2026

Órgaun Liga ho Klubu konkorda atu liga époka ne’e realiza abertura iha loron 06 fulan-Juñu tinan ne’e.

Díli, 16 Abril 2026 (RAFA.tl)- Órgaun Liga Futebol Timor-Leste (LFTL) hamutuk ho klubu sira primeira no segunda divizaun iha ona konkordánsia ba malu ba realizasaun Liga Timorense époka 2026.

Notísia Relevante: Maioria Klubu Primeira no Segunda Divizaun Husu Adia Liga Timorense Époka 2026

Iha enkontru Órgaun Liga ho Klubu sira ne’ebé realiza iha sede LFTL, Kuarta (15/04/2026), konkorda atu liga époka ne’e realiza abertura iha loron 06 fulan-Juñu 2026.

Órgaun Liga mós deside ona hodi loke janela transferénsia ba jogadór ba klubu sira hahú husi loron 16 fulan-Abríl no taka iha loron 09 fulan-Maiu 2026.

Iha Orsamentu ne’ebé Governu apóiu, liu husi Ministériu Juventude Desportu Arte no Kultura (MJDK) ba  Órgaun Liga hamutuk US$396.800,00 ho nune’e, Órgaun Liga ho konkordánsia husi klubu sira atribui subsídiu ba klubu sira primeira divizaun ba kada klubu sei hetan montante US$20,000.00 no segunda divizaun US$7,500.00.

Vise-Prezidente LFTL, Osório Florindo ba jornalista sira hatete, Órgaun Liga mós propoin atu adia liga époka ne’e ba Governu ho Federasaun, infelizmente kontaktu  parte sira la tau ba konsiderasaun, tanba ne’e konvoka ona reuniaun ho klubu sira hodi diskute ho kondisaun ne’ebé Governu kria ona ne’e, bele joga ka la joga, desizaun nafatin iha klubu sira.

“Desizaun liu husi votasaun katak, joga hahú iha loron 05 fulan-Juñu, ida ne’e mos konforme Governu, tanba Governu dehan: lae osan rai kleur liu, ami bele aloka fali ba fatin seluk, entaun tinan ida ne’e liga la la’o. Opsaun ida mak loron 22 Maiu ne’e, se Governu aseita, ha’u hanoin klubu hotu ohin aseita malu ona, orsamentu aumenta ka la-aumenta  tenke joga nafatin iha loron 05 fulan-Juñu,” Osório Florindo informa.

Iha fatin hanesan Prezidente Karketu Díli F.C, Luís Oliveira hatete, maske ho orsamentu ne’ebé ki’ik maibé klubu sira aseita hodi realiza liga ba époka ne’e no Karketu mós preparadu hodi halo mudansa ba jogadór sira hodi hasoru liga ne’ebé mai.

“Klubu hotu aseita liga ne’e tenke la’o iha tinan ida ne’e, maske orsamentu ki’ik oan, maibé hotu-hotu aseita atu LFTL realiza liga ida ne’e, iha opsaun rua mak ami hamutuk deside, ida komesa iha 22 de Maio, opsaun segundu Mak dia 5 de Juñu. Ami halo votasaun 05 fulan-Juñu mak avansa,” hatete Luís Oliveira.

Prezidente Karketu Díli F.C ne’e argumenta, Karketu deside ona estrutura ho orsamentu ne’ebé m ak mínimu ne’e sei entrega tomak subsídiu ho deslokasaun hamutuk US$23,000.00, ne’e ba jogadór jere, tanba ho orsamentu ne’ebé iha Karketu sente todan, maibé apóiu nafatin liga ne’e tenke la’o.

Rezultadu husi enkontru ne’e Órgaun Liga sei aprezenta fali ba MJDAK ne’ebé apóiu orsamentu hodi tetu relasiona ho oráriu ne’ebé deside ona.

Kona-bá kampu seidauk iha rezultadu fiksu, maibé tuir planu bainhira jogu ne’e hahú Estádiu Munisipál Díli iha faze reabilitasaun no jogu liga époka ne’e sei hala’o iha munisípiu.

Jornalista: Marito da Costa/Editór: Vito Salvadór