Maioria Klubu Primeira no Segunda Divizaun Husu Adia Liga Timorense Époka 2026

Ekipa Liga Futeból Timorense (LFTL) hahú halo diskusaun hodi realiza eventu Liga Futeból Timor-Leste époka 2026.

Díli, 08 Abríl 2026 (RAFA.tl) – Klubu primeira no segunda divizaun ne’ebé kompete iha Liga Timorense la konkorda ho estratejia no polítika Órgaun Liga Futeból Timor-Leste (LFTL) ne’ebé sei la fó subsídiu ba klubu no prémiu kampiaun ne’ebé tun husi US$25,000.00 mai US$10,000.00. Ho razaun hirak ne’e, maioria klubu husu adia Liga Timorense époka 2026 hodi Órgaun Liga bele iha tempu buka fundus.

Klubu hamutuk 20 mak partisipa iha enkontru ho Órgaun Liga mak hanesan primeira divizaun kompostu husi Karketu Díli F.C, Emmanuel F.C, F.C Porto Taibesse,  Assalam F.C, Coração F.C, As Marca, A.D S.L.B Laulara, Aitana F.C,  no Santa Cruz F.C.

Segunda divizaun kompostu husi Nagardjo F.C,  Lica-Lica Lemorai F.C, Fitun Estudante Lorosa’e F.C,  As ponta Leste, Akadémika F.C, F.C Vila Ataúro, F.C Weasel, A.C Mamura, Hibers Díli F.C no A.D Santo António.

Iha fundus ne’ebé Órgaun LFTL iha, apóiu husi Governu, liu husi Ministériu Juventude Desportu Arte no Kultura (MJDK),  aloka ona orsamentu ba  atividade Liga ba époka ne’e hamutuk US$500.000,00 no tuir planu LFTL nian, Liga Timorense époka 2026 sei hahú iha fulan-Maiu, tinan ne’e, maibé  klubu sira konsidera orsamentu ba liga ki’ik liu kompara ho tinan  kotuk, no sei afeta mós ba finansiamentu Órgaun Liga inklui subsídiu ba klubu sira.

Reprezentante Klubu Liga Timorense, Prezidente Karketu Díli F.C, Luís Oliveira ba jornalista sira iha edifísiu LFTL,  Kuarta (08/04/2026) hatete, la konkorda ho orsamentu ne’ebé iha, no husu LFTL atu adia no kontinua buka orsamentu adekuadu hafoin hahú liga ba époka ne’e.

Nia dehan sira-nia parta hakfodak oituan tanba orsamentu ne’ebé mak tinan  kotuk US$700,000.00 agora tun ba US$500,000.00, atu organiza liga primeira no segunda divizaun.

“Ami maioria klubu hotu la aseita ho orsamentu iha item balu, ezemplu  tinan kotuk deslokasaun US$500.00 agora tun ba US$300.00, no prémeiu kampiaun tinan kotuk US$25,000.00 agora tun ba US$10,000.00. Subsídiu laiha ba klubu sira, tinan kotuk iha subsídiu fulan ida US$10,000.00 agora laiha, ida ne’e mak halo ami maioria klubu primeira no segunda divizaun la aseita,” José Luis Oliveira hateten.

Prezidente Karketu Díli F.C konsidera orsamentu ba époka ne’e tenke diferente ho époka sira antes, atu nune’e bele valoriza esforsu husi jogadór sira.

Liga ne’e labele hanesan tinan kotuk ona, tenke avansa ba oin, di’ak liu fali tinan kotuk, agora ida ne’e hakiduk fali, ami Karketu konsidera tebes  ami nia jogadór, tane jogadór, para kualidade liga ne’e bele di’ak liu tan, se selu jogadór ida fulan ida  $ 50.00  nia joga mós  otomatis kualidade ne’e laiha.

“Taça da liga foin liu, ema hotu haré ho prémiu ida  di’ak tebes, agora derepente prémiu kampiaun Taça da Liga US$35,000.00 agora liga ida be órgaun boot liu hotu ne’e mak prémiu kampiaun ne’e US$10,000.00 de’it ne’e la justu, ami ezije LFTL, se bele buka orsamentu,” Tenik Luís Oliveira.

Hatán ba preokupasaun klubu sira nian ne’ebé iha, Prezidente LFTL,  Ipólito Soares hatete, parte órgaun liga rona no konsidera preokupasaun sira hotu no sei hato’o hikas ba Governu, alende ne’e LFTL mós sei buka meius hodi buka fundus, atu nune’e liga ba époka ne’e bele la’o tuir estimasaun ne’ebé klubu sira eziji.

Nia hatutan, ohin maioria klubu hakarak Órgaun Liga esforsu an para bele aproxima ba patrosinadór sira hodi bele aumenta fundus, nune’e liga ne’e bele la’o ho di’ak, tanba liga ne’e nia intensaun mak atu haforsa ita nia selesaun Nasionál. Bainhira kondisaun nune’e, depois liga la’o ho primeira volta de’it  signifika nia kualidade ladún di’ak, ne’e mak liga tenke pasiénsia rona sira hotu.

“Agora ami sei prepara hela karta, atu ba relata ba Governu katak liga ne’e ami seidauk bele komesa, tanba kondisaun klubu la permite, portantu ita hein desizaun husi Governu atu ami bele informa fali ba klubu hodi enkontru fali.” Hatete Ipólito Soares.

Nia argumenta, semana rua kotuk Órgaun Liga kontaktu hela instituisaun ida ba marketing nian, sira mós prontu para ajuda liga atu buka servisu hamutuk para bele buka sponsor sira hanesan mos Taça da Liga, halo ne’e no sira prontu para bele ajuda liga atu buka orsamentu husi patrosinadór sira, no espera semana oin ne’e ami bele hasoru malu hodi organiza ou bele halo marketing para bele  hetan fundus balu, nune’e liga ne’e bele la’o di’ak.

Jornalista: Marito da Costa/Editór: Vito Salvadór