Timor-Leste Sei Organiza Eventu Díli Internasionál Maratona Ba Promosaun Desportu no Turizmu

Prezidente Komisaun Organizadora ba eventu Díli Internasionál Maratona, Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay,Tersa (31/03/2026), iha Palásiu Prezidensiál, lidera reuniaun komisaun organizadora ba eventu Díli Internasionál Maratona. Imajen/Rafa.tl

DÍLI, RAFA.tl– Prezidénsia Repúblika (PR) ho Governu sei organiza eventu Díli Internasionál Maratona ho objetivu ba promosaun Desportu no Turizmu Timor-Leste.

Prezidente Komisaun Organizadora ba eventu Díli Internasionál Maratona, Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay,Tersa (31/03/2026), iha Palásiu Prezidensiál, lidera reuniaun komisaun  organizadora ba eventu Díli Internasionál Maratona ne’ebé sei hahú iha loron 08-fulan-Agostu 2026, maibé ekipa tékniku no komisaun sei halo uluk selesaun ba atleta sira nível nasionál iha fulan-Maiu nia laran.

Prezidénsia Repúblika no Governu iha expetativa boot katak Díli Internasionál Maratona, tinan ida ne’e, bele akumula partisipante barak liután atu halo promosaun no promove Timor-Leste nia imajen ba mundu internasionál.

“Díli Maratona ne’e, ita atu promove desportu no Turizmu, liu-liu atu hatudu ba mundu katak ita nia rain, rai ne’ebé maka estável, nune’e mós ita iha unidade ne’ebé di’ak teb-tebes.” Vise-Primeiru-Ministru Francisco Kalbuadi Lay hateten.

Vise-Primeiru-Ministru  ne’e hatutan, além de Díli Internasionál Maratona, Timor-Leste mós sei organiza Simeira Siénsia ba Dezenvolvimentu ho objetivu atu atrai sientista sira ba hametin diálogu kona-bá inovasaun ba dezenvolvimentu.

Prezidente Repúblika José Ramos-Horta, ho influénsia ne’ebé iha, sei konvida polítiku sira ne’ebé influensiadu, ekonomista sira ne’ebé di’ak iha mundu atu mai fahe esperiénsia inklui ema sira ne’ebé péritu iha área ambiente no mós teknolojia.

“Simeira Siénsia ba dezenvolvimentu ida ne’e importante teb-tebes atu atrai péritu sientífiku sira atu hametin diálogu kona-bá inovasaun ho dezenvolvimentu ho universitáriu sira, dosente sira, doutor sira hodi ko’alia kona-bá siénsia no mos paz no estabilidade.” Tenik nia.

Vise-Primeiru-Ministru Francisco Kalbuadi Lay subliña, tinan ne’e mós, iha eventu natal ho povu, Governu junta forsa hamutuk ho Prezidensia Repúblika atu bele atende di’ak liután komunidade sira.

Reportajen ekipa Rafa.tl