Domingu Finál Jogu LTFF, A.D S.L.B Laulara ho S’amuser F.C Preparadu Hadau Títulu Kampiaun

Imajen/LTFF

DÍLI, RAFA.tl– Jogu Liga Timorense Futeból Femenino (LTFF) tama ona ba faze finál no Ekipa S’amuser F.C ho A.D S.L.B Laulara iha oportunidade hanesan atu hetan títulu kampiaun ba epoka ne’e.

Notísia Relevante: Ekipa V.D.L F.C Kontinua Hela iha Zona Mean Hafoin Derrota ho Skor 0-5 Kontra Academika F.C

Iha jogu finál LTFF, Domingu, 22 fulan-Marsu ne’e, sei nakonu ho ambisaun no priviléjiu, halo treinadór husi ekipa S’amuser F.C no A.D S.L.B Laulara iha preparasaun másimu ba tatika no fiziku jogadora sira nian hodi manan jogu no sai  kampiaun.

Treinadór ekipa A.D S.L.B Laulara,  Filomino Junior da Costa, liu husi konferénsia imprensa iha Xanana Sport Centre, Sábadu (21/03/2026) hatete, maske antes ne’e  nia ekipa lakon ona ho S’amuseer F.C,  maibe SLB iha ona  tátika hodi antesipa frakeza ne’ebé S’amuser F.C iha.

“Ita hatene katak  jogu Domingu aban ne’e, 22 Marsu 2026,  jogu  desezivu uitoan. Kona-bá preparasaun, ami prepararadu ona atu antesipa frakeza no pontu forte ne’ebé mak  S’amuser F.C iha,” Filomino Junior da Costa hateten.

Treinadór ne’e argumenta, dalan laiha ba A.D S.L.B atu empata ka lakon, tenke manan duni. Nune’e, Kapitaun AD SLB Laulara,  Vanesa Pimentel, hatutan sira-nia parte sei halo jogu ida tuir instrusaun ne’ebé treinadór iha nune’e bele hetan vitória.

“Ami jogadora mós sei halo instrusaun tuir treinadór fo mai ami no aban ami sei hatudu buat ne’ebé mak durante ne’e ami prepara no ami mós fiar aan katak aban ami mós laiha dalan atu lakon no empata. Tenke manan,” Vanesa Pimentel afirma.

Iha fatin hanesan Treinadór  S’amuser F.C, Julião dos Reis Mendonça hateten nia ekipa mós prepatradu hodi kontra A.D S.L.B Laulara iha jogu ikus liga Femenino.

“Ami prontu ba aban kontra A.D S.L.B, ami prontu iha minutu 90 ba oin mak sei termina iha kampiaun,” Julião dos Reis Mendonça afirma.

Kapitaun S’amuser F.C, Modelivia Martins hateten sei motiva nia maluk jogadora sira hodi halo jogu ida ho kuidadu no asegura pontu tolu hodi hetan kampiaun.

“Ami mantein nafatin ami nia jogu ho tátika no estratejia ne’ebé mak treinadór fó ona bainhira kontra A.D S.L.B. Ami fiar katak  iha minutu 90 sei hatudu buat ne’ebé di’ak, ” Modelivia Martins tenik.

Ekipa S’amueser ho A.D S.L.B Laulara sei halao sira nia jogu ikus LTFF  iha Domingu, 22 fulan-Marsu ne’e, hale’u tuku 19:00 Otl, iha Kampu Federasaun Futeból Timor-Leste (FFTL).

Reportajen ekipa Rafa.tl