UNITAL F.C Lakon ho Skor 1-8, Jogadora Buibere F.C Carla Patinasarany Halo Quintrick

Ekipa UNITAL F.C. Imajen/Liga Timorense de Futebol Feminino

DÍLI, RAFA.tl– Ekipa Buibere F.C susesu rekolla vitória importante iha jornada 17 hafoin halakon UNITAL F.C ho skor 8-1.

Notísia Relevante: Liga Femenino, Maranatha F.C Manán Akadémica F.C ho Skor 7-1

Iha jogu  kontinuasaun Liga Timorense Futeból Femenino ne’ebé hala’o iha Kampu Federasaun Futeból Timor-Leste (FFTL), Sábadu (14/03/2026), jogadora Carla Patinasarany marka Quintrick hodi oferese ba nia ekipa.

Ekipa Buibere F.C susesu marka uluk golu ida iha minutu 8 liu husi jogadora Carla Patinasarany hodi muda skor ba 1-0.

Ekipa UNITAL F.C mós kontinua halo presaun ba  Buibere F.C hodi halo kontra atake liu husi bola oportunidade ne’ebé iha, maibé sira falla iha ezekusaun.

Tama ba minutu 15 ekipa Buibere F.C kontinua marka golu ida tan liu husi jogadora Novenia Gabriela hodi muda skor ba 2-0.

Ho tátika no jogu ne’ebé iha, ekipa Buibere F.C kontinua marka golu liu husi jogadora Deonizia Guimarães iha minutu 19 no lori Buibere F.C lidera jogu ho eskor 3-0.

Ekipa UNITAL F.C mantein ho jogu ne’ebé iha no tenta sai husi presaun. Nune’e, sira lansa mós kontra atake ba ekipa Buibere F.C, maibé ekipa adversáriu sei forte liu no mantein domina jogu ne’ebé iha.

Tama ba minutu 26 ekipa Buibere F.C aumenta tan golu ida liu husi jogadora Carla Patinasarany hodi muda skor ba 4-0.

Ekipa Buibere F.C kontinua domina jogu no lansa atake barak ba nia adversáriu UNITAL F.C, nune’e tama ba minutu 37, jogadora Buibere F.C Lucelia Fernandes konsege marka golu ba nia ekipa liu husi bola falta.

Hafoin golu ne’e, ekipa UNITAL F.C komesa halo mudansa ba tátika hodi halo balansu ba adversáriu nia jogu no to’o primeira parte termina Buibere F.C mantein lidera jogu ne’e ho skor 5-0.

Iha segunda parte, jogu foin hahú minutu rua deit, ekipa UNITAL F.C lansa kedas kontra atake lais liu husi tátika ne’ebé iha no jogadora Floriana Viana marka kedas golu ida hodi muda skor ba 1-5.

Buibere F.C ne’ebé lidera jogu ne’e kontinua halo esforsu hodi aumenta golu no tama ba minutu 53, jogadora Carla Patinasarany aumenta tan golu ida hodi muda skor ba 6-1.

Buibere FC hasae liután sira-nia intensidade jogu hodi marka tan golu ida iha minutu 76 no muda skor ba 7-1.

Iha minutu 80 ba leten, UNITAL F.C hetan oportunidade liu husi bola falta, maibe sei falla iha ezekusaun.

Buibere F.C kontinua marka golu ida tan liu husi jogadora Carla Patinasarany iha minutu 84 hodi muda skor ba 8-1 no ho vitória ne’ebé Buibere F.C rekolla halo ekipa ne’e mantein lidera tabela klasifikasaun Liga Timorense Futeból Femenino.

Tuir orariu jogu liga femenino, Domingu ne’e, ekipa S’amuser F.C sei kontra V.D.L F.C iha oras tuku 16:00 OTL no Maudoko F.C sei kontra AD SLB Laura, oras 19:00 OTL iha Estádiu FFTL.

Reportajen ekipa Rafa.tl