Liga Femenino, Maranatha F.C Manán Akadémica F.C ho Skor 7-1

Ekipa Maranatha F.C. Imajen/Rafa.tl

DÍLI, RAFA.tl- Ekipa Maranatha F.C susesu domina jogu no manán nia adversáriu Akadémika F. C ho skor 7-1 iha jogu  jornada 17, Liga Timorense Futeból Femenino ne’ebé hala’o iha kampu Federasaun Futeból Timor-Leste (FFTL), Sesta (13/03/2026).

Notísia Relevante: Liga Femenino, Maranatha F.C Susesu Halakon V.D.L F.C ho Skor 4-0

Maranatha F.C hatudu kedas nia ambisaun atu manán jogu ne’e iha minutu dahuluk.  Nune’e. jogadora sira ekipa Maranatha F.C konsege lansa kedas atake no halo pasajen bola lais husi ain ba ain hodi fó presaun ba ekipa Akadémika F.C.

Ekipa Akadémika F.C mantein ho tátika ne’ebé treinadór orienta iha treinamentu no halo balansu ba jogu hodi buka lansa mós ameasa no kontra atake ba adversáriu.

Tama ba minutu 26, Jogadora Maranatha F.C, Barbalina Salapesi marka uluk golu ida ba nia ekipa hodi muda skor ba 1-0. Maske nune’e, ekipa Akadémika F.C la hakmatek no responde kedas golu ne’e iha minutu 37 liu husi jogadora Devi Safitri hodi muda skor ba 1-1.

Ekipa rua iha balansu ba jogu, maibé Maranatha F.C iha liu oportunidade hodi marka golu daruak liu husi jogadora Nofa Sofi iha minutu 45 (+2) hodi muda skor ba 2-1.

Kontinua ba segunda parte, ekipa rua hasa’e liután sira nia intensidade jogu hodi buka domina jogu no kaer bola barak liután ho ambisaun marka golu.

Ekipa Maranatha F.C kontinua marka golu liu husi jogadora Nova Sofi Hodi muda skor ba 3-1.

Tama ba minutu 51 jogadora Marciana Cardoso marka tán golu ida hodi habót skor ne’ebé Maranatha F.C iha no kontinua ba minutu 73 jogadora Nofa Sofi marka tan golu ida hodi muda skor ba 5-1.

Akadémika F.C tenta halo substituisaun ba jogadór hodi halo mudansa ba tátika, maibé Maranatha F.C kontinua domina jogu no marka tán golu iha minutu 85 liu husi jogadora Marciana Cardoso, no tama ba minutu 90 jogadora Eugênia Lopez marka golu ikus hodi muda skor ba 7-1 no golu ne’e mak termina ekipa rua nia jogu no Maranatha F.C rekolla pontu tolu no Akadémika F.C obrigadu tenke fila ho liman mamuk.

Tuir oráriu, jogu liga femenino iha Sábadu,  14 fulan-Marsu ne’e, ekipa Buibere F.C  kontra UNITAL F.C iha Estádiu FFTL, hale’u  tuku 19:00 Otl.

Reportajen Ekipa Rafa.tl