Liga Timorense Futeból Femenino, A.D S.L.B Laulara Vs Buibere F.C Empata 2-2

A.D S.L.B Laulara fahe pontu hanesan ho Buibere F.C ho skor 2-2 iha jogu kontinuasaun Liga Timorense Futeból Femenino, Domingu (08/03/2026). Imajen/Rafa.tl

DILI, RAFA.tl– Iha jogu kontinuasaun Liga Timorense Futeból Femenino ba jornada 16, ekipa A.D S.L.B Laulara obrigadu tenke fahe pontu hanesan ho Buibere F.C hafoin ekipa rua empata 2-2.

Notísia Relevante: Maudoko F.C Sofre Derrota 1-2 Kontra S’amuser F.C

Iha jogu ne’ebé hala’o iha Kampu Federasaun Futeból Timor-Leste (FFTL), Domingu (08/03/2026), ekipa A.D S.L.B Laulara ho Buibere F.C iha hotu ambisaun hakarak rekolla vitória, tanba ekipa rua sai hanesan ekipa prestíjiu ne’ebé kada tinan sempre reforsa maioria husi jogadora selesaun nasionál Feto Timor-Leste.

Ekipa rua halo jogu ida atrativu, tanba hetan apóiu másimu husi adeptu sira iha tribun, no iha primeira parte, ekipa A.D S.L.B Laulara domina liu jogu hodi halo atake barak ba ekipa Buibere F.C.

Buibere F.C hetan oportunidade ida hodi marka uluk golu ba adversáriu A.D S.L.B Laulara liu husi suta bola falta, maibé baliza A.D S.L.B Laulara  antisipa bola falta ne’e ho di’ak no salva nia rede husi golu.

Ekipa A.D S.L.B Laulara marka uluk golu ida ba Buibere F.C liu husi jogadora  Elvira da Silva iha minutu 38 hodi muda skor ba 1-0.

Ho golu ne’ebé adversáriu produz halo ekipa Buibere F.C esforsu liután hodi halo empata no hadau vitória.

Esforsu sira ne’e hetan rezultadu di’ak hafoin iha minutu ikus primeira parte ekipa Buibere F.C liu husi jogadora Lucelia Fernandes marka golu ida ba nia ekipa aproveita bola falta hodi muda skor ba 1-1.

Kontinua ba segunda parte, ekipa rua mantein halo jogu ida ho intensidade aas, maibé ekipa Buibere F.C hetan uluk oportunidade hodi marka golu daruak iha minutu 73 liu husi jogadora Carla Patinasarany hodi muda skor ba 2-1.

Ekipa A.D S.L.B Laulara kontinua halo esforsu no domina jogu iha liña klaran no halo kontra atake lais ba adversáriu Buibere F.C, nune’e tama ba minutu 87 ekipa A.D S.L.B Laulara hetan prémiu penalidade ida hafoin jogadora Buibere F.C komete erru no halo handball iha grande área laran.

Jogadora Astari Songe ne’ebé hetan konfiansa hodi ezekuta penalidade ne’e konsege halo ezekusaun ho di’ak no marka golu hodi halo empata jogu ne’e ho skor 2-2.

Iha minutu ikus jogu atu termina, ekipa rua halo mudansa ba tátika no hasa’e liután intensidade jogu no halo kontra atake barak ba malu, maibé la rezulta golu ruma, nune’e ekipa rua tenke orgullu no fahe pontu hanesan.

Tuir oráriu jogu liga femenino iha Kinta, 12 fulan-Marsu ne’e, ekipa Kulugisa F.C husi Munisípiu Baucau sei kontra ekipa Na’in Feto F.C iha kampu FFTL iha  tuku 16:00 OTL.

Reportajen ekipa Rafa.tl