Maudoko F.C Sofre Derrota 1-2 Kontra S’amuser F.C

Ekipa S’amuser F.C. Imajen/Liga Timorense de Futebol Feminino

DILI, RAFA.tl– Ekipa Maudoko F.C sofre derrota 1-2 kontra nia adversáriu S’amuser F.C iha jogu kontinuasaun Liga Timorense Futeból Femenino ne’ebé hala’o iha kampu Futeból Federasaun Futeból Timor-Leste (FFTL), Díli, Domingu (08/03/2026).

Notísia Relevante: Liga Femenino, Maranatha F.C Susesu Halakon V.D.L F.C ho Skor 4-0

Iha jogu primeira parte, Maudoko F.C ne’ebé reforsa husi jogadora estranjeiru  ho nasionalidade Indonézia hola kedas inisiativa hodi  domina bola iha kampu laran atu bele fó presaun ba S’amuser F.C

Ekipa rua hatudu jogu ida atrativu tebes tanba maioria husi jogadora sira ne’ebé reforsa ekipa rua iha performa ida di’ak. Sira hatudu jogu bonita hodi lansa kontra atake ba malu ho tátika ne’ebé sira adota.

Tama ba minutu 30 ba leten, ekipa S’amuser F.C hatudu jogu ida dominante tebes, maibé jogadora sira la aproveita oportunidade hodi halo golu, nune’e ekipa rua fahe pontu hanesan ho skor 0-0 iha jogu primeira parte.

Tama ba segunda parte, ekipa Maudoko F.C hola inisiativa hodi halo rotasaun ba jogadora iha liña klaran no halo substituisaun ba jogadora sira hodi  halo atake ba S’amuser F.C.

Iha segunda parte ne’e, ekipa Maudoko F.C domina liu jogu maibé S’amuser F.C hola inisiativa hodi joga de’it iha nia área hodi lansa kontra atake lais no tátika ne’ebé treinadór sira aplika, iha duni rezultadu tanba tama ba minutu 58, jogadora S’amuser F.C, Dolores da Costa, marka golu ida ba nia ekipa hodi muda skor ba 1-0.

Tama minutu 65, S’amuser F.C konsege aumenta tan sira nia golu liu husi  jogadora Cerlin Sarmento hodi muda skor ba 2-0.

Ekipa Maudoko F.C kontinua halo esforsu no hahú halo tranzisaun no mudansa ba tátika hodi halo atake ba S’amuser F.C no tama ba minutu 72 jogadora Marcela Awi marka golu ida ba nia ekipa hodi lori hikas motivasaun  atu halo esforsu liután buka impata ka gaña vitória.

Maudoko F.C  halo presaun maka’ás liután ho intensaun hakarak halo impata ba jogu ne’e, maibé oportunidade ne’ebé jogadora Maudoko F.C hetan sei falla, nune’e S’amuser F.C mantein ho rezultadu ne’ebé iha no manan ho skor 2-1.

Tuir orariu jogu liga femenino iha Kinta, 12 fulan-Marsu ne’e,  ekipa Kulugisa F.C  kontra ekipa Nain Feto F.C iha kampu FFTL, iha tuku 16:00 OTL.

Reportajen ekipa Rafa.tl