Nain Feto F.C Fahe Pontu Hanesan ho Acadêmica F.C ho Skor 1-1

Ekipa jogadora Academika F.C. Imajen/Rafa.tl

DILI, RAFA.tl– Iha jogu kontinuasaun Liga Timorense Futeból Femenino, ekipa Nain Feto F.C fahe pontu hanesan ho  nia adversáriu Acadêmica F.C ho skor 1-1.

Notísia Relevante: Liga Femenino, Na’in Feto F.C Halakon Adversáriu V.D.L F.C ho Skor Fantástiku 9-0

Iha jogu kontinuasaun Liga Femenino, ne’ebé hala’o iha kampu FFTL, Sesta (06/03/2026), ekipa Nain Feto F.C no Acadêmica F.C hala’o jogu ida atrativu ho kontra atake ba malu hodi lansa oportunidade sira ba marka golu atu hadau vitória.

Iha minutu dahuluk sira jogu hahú, ekipa Acadêmica F.C hetan uluk oportunidade liu husi bola falta, maibé ezekusaun ne’ebé jogadora sira hetan la utiliza másimu hodi hatama golu.

Jogu kontinua la’o no ekipa Acadêmica F.C nafatin hatudu superioridade hodi domina bola liu husi pasajen bola badak,  nune’e tama ba minutu 8, jogadora Acadêmica F.C, Avelinha konsege marka golu no lori nia ekipa lidera jogu ne’e ho skor 1-0.

Ekipa Nain Feto F.C mantein ho jogu no hahú halo tranjisaun ba tátika hodi buka meius atu halo impata, maibé to’o primeira parte termina ekipa Acadêmica F.C kontinua lidera jogu ne’e.

Tama ba segunda parte, ekipa rua halo mudansa ba performa no halo substituisaun ba jogadora iha ne’ebé ekipa Nain Feto F.C hahú halo halo jogu ida ho kontra atake maka’as hodi duni sira nia derota ne’ebé iha no hakarak marka golu ba halo impata.

Ekipa Nain Feto kontinua domina jogu iha minutu 60 ba leten no halo presaun barak ba sira-nia adversáriu Acadêmica F.C, maibé sei falla atu marka golu no ekipa rua mantein ho skor ne’ebé iha.

Haré ba oportunidade ne’ebé iha, Acadêmica F.C tenta halo jogu ida ho estratejia oinsá hametin liña defeza hodi xave vitória ne’ebé iha, maibé falla, tanba tama ba minutu 90+1, ekipa Nain Feto F.C liu husi jogadora Elentria Verlika konsege marka golu ida hodi muda skor ba 1-1.

Ho golu husi ekipa Nain Feto F.C iha minutu ikus segunda parte ne’e obriga ekipa rua tenke fahe pontus hanesan.

Tuir oráriu, jogu liga femenino,  Sábadu, 07 fulan-Marsu ne’e, ekipa Maranatha F.C sei hasoru Vale de Lahane F.C, no iha loron tuir mai, Domingu, ekipa Maudoko F.C  kontra S’amuser F.C inklui AD SLB Laulara sei kontra Buibere F.C iha tuku 19:00 Otl.

Reportajen ekipa Rafa.tl