Governu iha Kompromisu Apóiu Liga Timorense Époka 2026

Enkontru MJDAK ho LFTL , Segunda (02/03/2026). Imajen/Mídia MJDAK

DILI, RAFA.tl– Governu liu husi Ministériu Juventude, Desportu, Arte no Kultura (MJDAK), iha kompromisu forte  apóiu Órgaun Liga Futeból Timor-Leste (LFTL) hodi organiza Liga Timorense époka 2026.

Kompromisu  Governu nian ne’e hatudu liu husi enkontru Órgaun LFTL ho MJDAK iha Salaun Magna MJDAK, Segunda (02/03/2026), hodi diskute posibilidade sira Liga Timorense bele hahú iha loron 10 fulan-Abríl, tinan ne’e.

“Ohin, ita ko’alia kona-bá Futeból, automatikamente Governu tau hela orsamentu ba implementasaun ba époka tuir mai ba liga Futeból  nian,  ita iha osan seidauk temi, tanba agora ita halo hela faze preparasaun, ba oin ne’e ita hamutuk ho Liga Futeból Timor-Leste  para rona vantajen sira ne’ebé akontese iha tinan 2025 no mós saida mak sei akumula ba 2026 hodi ita hetan aprovasaun orsamentu ba époka tuir mai,” Diretór Jerál MJDAK, João Rodrigues hateten.

Nia hatutan, além de kompetisaun ba jogu modalidade futeból, iha tinan ne’e mós Governu sei realiza jogu sira seluk hanesan Volleyball, Basketball no mós ho modalidade desportivu sira seluk.

MJDAK liu husi diresaun Jerál desportu hetan montante orsamentu ne’ebé natón atu dezenvolve desportu, anualmente  tenke iha ona kalendáriu ne’ebé fiksu ba atividade, la’ós de’it ba futeból, maibé mós iha liga Volleyball, liga Basketball, no kampionatu ba federasaun lubuk ida.

“Ne’ebé kompetisaun ne’e sei lubuk ida no orientasaun husi Ministru MJDAK  nian katak akontesimentu atividade desportu ne’e hakarak tinan tomak. Tanba  ne’e, ita husu ba Federasaun Liga Futeból Timor-Leste organiza karik labele akontese fulan hitu ba ktividade futeból iha Timor laran tomak,” João Rodrigues tenik.

Diretór Jerál MJDAK ne’e informa, semana oin Governu sei organiza reuniaun tripartida ne’ebé sei envolve Governu, LFTL no mós Federasaun Futeból Timor-Leste (FFTL) hodi deskute kona-bá subsídiu ba klubu no órgaun liga.

Iha fatin hanesan Prezidente LFTL, Ipólito Soares hatete, agradese ba Ministru Juventude Desportu Arte no Kultura (MJDAK), Nelio Isaac Sarmento,  ne’ebé iha kompromisu atu kontinua apóiu órgaun liga no simu mós orientasaun atu oinsá bele organiza liga iha fulan-Abríl nia laran.

Nia hatutan, órgaun LFTL mós sei tuur hamutuk ho FFTL hodi buka solusaun ba kampu ne’ebé sei utiliza ba atividade jogu nian, tanba kampu mak sai hanesan dezafiu ne’ebé durante ne’e órgaun liga enfrenta.

Prezidente LFTL informa katak, tuir planu abertura ba liga époka ida ne’e sei hahú iha loron 10 fulan-Abríl 2026. Tanba hakarak jogadór sira labele deskansa barak liu, tanba ho atividade rutina sira ne’e hotu bele mós kontribui ba selesaun nasionál.

Planu LFTL nian, kompetisaun sei la’o ho formatu full competition, durasaun fulan-neen, tanba  primeira divizaun iha klubu 10 no mós ho segunda divizaun iha klubu 10 mak sei kompete.

Reportajen ekipa Rafa.tl