Jogadór Emmanuel F.C. Na’in-Tolu Rekolla Prémiu Tolu, Jardiel Piedade Markadór Di’ak Liu iha Taça da Liga FFTL

Markadór di’ak liu (top score) iha Taça da Liga FFTL, Jardiel Piedade simu prémiu karreta suzuki Alto entrega husi Prezidente Autoridade Munisípiu Díli, Francisco dos Santos, Sábadu-kalan (28/02/2026). Imajen/Rafa.tl

DILI, RAFA.tl– Jogadór na’in-tolu husi ekipa Emmanuel F.C rekolla prémiu indivídu tolu iha kompetisaun Taça da Liga  Federasaun Futeból Timor-Leste ( FFTL ).

Notísia Relevante: Prezidente FFTL Promete Harii Kampu Futeból Dignu no Reabilita Estádiu Díli

Jogadór Emmanuel F.C na’in-tolu ne’e, mak Nilton Carvalho hetan títulu jogadór di’ak liu ( Best Player ), Dramicio Agusto  Moreira nu’udár jogadór juvenil di’ak liu ( Best Young Player) ho Alexandre Oscar Lima Quintão nomeadu nu’udár guarda-rede di’ak liu (Best Goalkeeper ).

Iha jogu Taça da Liga FFTL ne’e sai hanesan markadór di’ak liu (top score) mak jogadór Jardiel Peidade, husi klubu F.C Porto Taibessi ho golu neen (6). Jardiel Piedade hetan prémiu karreta Suzuki Alto ida ne’ebé oferese husi  patrosinadór Sali-Magu no Metrolink.

Jogadór Emmanuel F.C na’in-tolu nomeadu bazeia ba selesaun, observasaun no votasaun ne’ebé treinadór no kapitaun ekipa husi klubu sira ne’ebé partisipa iha Taça da Liga FFTL époka ne’e.

Jogadór Emmanuel F.C Nilton Carvalho agradese ba treinadór no asistente treinadór ne’ebé durante ne’e transforma koñesimentu no abilidade ba nia to’o hetan títulu  jogadór di’ak liu ( Best Player ) iha Taça da Liga  FFTL.

“Primeiru agradese ba Maromak, la haluha mós ba ami nia adeptu sira ne’ebé suporta ami másimu, ida ne’e mós sura iha ami nia votu, sentimentu orgullu tanba bele hetan jogadór di’ak liu, hanesan primeira faze ida mai ha’u atu ultrapasa ba  iha faze tuir mai,” Nilton Carvalho hatete.

Jogadór  Dramicio Agusto  Moreira agredese ba ekipa nia esforsu tomak no konsege lori nia sai jogadór juvenil di’ak liu iha kompetisaun Taça da Liga  no nia promete  esforsu hodi kontinua mantein títulu ne’e iha jogu sira tuir mai.

“Primeiru agradese ba Aman Maromak ne’ebé mak durante ne’e akompaña ha’u dezde kiik-oan to’o agora. Ha’u Sub-17 reprezenta ha’u nia maluk sira, motiva nafatin ha’u nia maluk sira, hodi nune’e, kompete ba jogu tuir mai. Ha’u mos husu obrigadu barak ba klubu Emanuel F.C  ba prezidente, treinadór, no mós ba ha’u nia maun seniór sira, ne’ebé mak durante ha’u treinu ho sira, hamutuk ho sira, jogu ho sira, ohin loron, bele hetan jogadór juvenil di’ak Sub-17,” Dramicio Agusto Moreira hatete.

Guarda-rede di’ak liu, Alexandre Oscar Lima Quintão, agradese no apresia  ba FFTL ne’ebé kria kompetisaun fó valór boot ba jogadór sira no nia parte mós husu atu kontinua kria kompetisaun sira hanesan hodi eleva kapasidade jogadór  sira iha rai laran.

“Apresia tebes tanba hetan guarda-rede di’ak liu, durante esforsu treinu no kolen maibé hetan duni rezultadu di’ak ida-ne’e. Ha’u sente apresia tebes, ha’u sei treinu maka’as tan,” Alexandre Oscar Lima Quintão afirma.

Jogadór di’ak liu iha Taça da Liga FFTL époka ne’e simu karreta ho marka Suzuki ALTO ne’ebé oferese husi Patrosinadór Sali-Magu no Metrolink.

Guarda-rede di’ak liu Simu karreta ho marka Suzuki ALTO, ne’ebé mós oferese husi patrosinadór Sali-Magu no Metrolink.

Jogadór juvenil di’ak liu ( Best Young Player)  Sub-17 hetan prémiu osan US$2,000.00 husi patrosinadór ILLINOI ho motór marka Honda Beat ida husi patrosinadór ASB NAGI.

Reportajen ekipa Rafa.tl