Emmanuel F.C Kampiaun Taça da Liga Hafoin Halakon Karketu Díli F.C ho Skor 1-0

Emanuel F.C sai kampaiun Taça da Liga hafoin halakon Karketu Díli, F.C ho skor 1-0. Imajen/Rafa.tl

DILI, RAFA.tl- Jornada Taça da Liga Federasaun Futeból Timor-Leste (FFTL)  to’o ona ba rohan. Jogu naruk hahú husi faze grupu to’o finál, Emmanuel F.C mak sai hanesan ekipa dahuluk marka istória ba futeból Timor-Leste hafoin iha finál halakon nia adversáriu Karketu Díli F.C ho skor 1-0  hodi sai hanesan kampiaun.

Notísia Relevante: Predisaun Finál Taça da Liga: Karketu Díli F.C Favoritu Ba Kampiaun no Emmanuel F.C iha Vantajen Hadau Vitória

Iha jogu finál entre ekipa Emmanuel F.C ho Karketu Díli F.C ne’ebé hala’o iha Estádiu Munisipál Díli, Sábadu (28/02/2026), halo adeptu rihun-resin hakonu Estádiu to’o adeptu  balun la hetan fatin no tenke hamrik iha pista ne’ebé haleu estádiu, inklui balun hamrik iha moru leten tanba hakarak asiste sira nia ekipa favoritu joga.

Iha jogu primeira parte, Emmanuel F.C ho Karketu Díli F.C hahú kedas jogu ho intensidade no ritmu ne’ebé as no lansa kedas kontra atake ba malu.

Karketu Díli F.C hetan uluk oportunidade sira hodi halo presaun ba adversáriu Emmanuel F.C maibé sei falla iha ezekusaun.

Emmanuel F.C kontinua halo balansu ba jogu no hetan ritmu iha liña klaran hodi hadau oportunidade atu kontrola jogu no ida-ne’e halo Emmanuel F.C lansa kontra atake ba adversáriu Karketu Díli F.C.

Tama ba extra time primeira parte Emnuel F.C konsege lansa golu ida liu husi liña koordenasaun jogadór avansadu Angenuku Viegas ho Vincent Kojo Nortey ne’ebé rezulta hatama golu hodi muda skor ba 1-0.

Iha segunda parte, ekipa Emmanuel F.C kontinua domina bola no Karketu Díli F.C kontinua halo subtituisaun iha liña oin hodi buka oportunidade atu halo golu maibé sei falla.

Emmanuel F.C mantein nia ritmu ho atake no halo presaun ba adversáriu Karketu Díli F.C. Haré katak iha jogu Emmanuel F.C domina liu bola kompara ho adversáriu tama minutu 80 ba leten, Emmanuel F.C kontinua halo subtituisaun iha liña klaran no avansadu hodi hametin liña klaran ho intnesaun bele halo jogu ida mais defensivu no rapidu iha liña klaran no mantein domina jogu too segunda parte termina no vitória ba Emmanuel F.C.

Jogadór Karketu Díli F.C, Olegar Malik Xavier “Kaka” hatete iha jogu sira esforsu no hetan mós oportunidade, maibe tanba iha fatór balu ne’ebé la fó sorte ba sira atu sai kampiaun iha taça ne’e.

“Parabéns ba Emmanuel F.C ne’ebé ohin manan. Jogu ne’e intensidade aas, ami iha oportunidade barak liu sira, maibé hanesan ema dehan fator Lucky ne’ebé ami la konsege hatama golu ba sira nia guarda rede,” Kaka hateten.

Jogadór sira Emmanuel F.C aproveita ho sala oituan husi falta, tanba ne’e sira  hatama golu Ida ba rede Karketu Díli F.C.

“Ne’e hanesan matéria ida mai ami katak, ami sei hadia diak liután husi sala sira kiik oan Sira hanesan ne’e, no ami sei prepara Diak liután hodi hasoru iha liga mai agora,” Olegar Malik Xavier rekoñese.

Prezidente Emmanuel F.C, Aleixo de Carvalho hateten,  sira-nia ekipa  hateten vitória ne’ebé hetan la’ós marka istoria foun tanba iha jogu antes mós Karketu Díli F.C seidauk manan Emmanuel   no nia parte mós agradese no louva Prezidente FFTL ne’ebé iha komromisu no hatudu ona iha realidade hakarak lori futébol sai orgullu nasionál.

“Ha’u kontente tanba Prezidente FFTL Nilton Telmo Gusmão dos Santos bele kria Taça da Liga,  ida-ne’e sai orgullu nasionál,” Aleixo de Carvalho hateten.

Prámiu ba kampiaun, Emmanuel F.C hetan osan ho montante US$35,000. 00, Taça no medalla, ne’ebé atribui husi Patrosinadár prinsipál Taça da Liga FFTL, grupu empreza Esperança Timor Oan (ETO,Lda), no runner-up Karketu Díli F.C hetan osan ho montante US$10,000.00 ne’ebé mós oferese husi patrosinadór ETO,Lda.

Reportajen ekipa Rafa.tl