Jogadór F.C Porto Taibessi, Jardiel Piedade Lidera Provizóriu Tabela Top-Skor Taça da Liga ho Golu-Neen

Jogadór F.C Porto Taibessi, Jardiel Piedade. Imajen/Rafa.tl

DILI, RAFA.tl – Jogadór F.C Porto Taibessi, Jardiel Piedade, lidera provizóriu tabela Top-Skor Taça da Liga ho golu-neen ne’ebé jogadór ne’e koleta durante kompetisaun hahú husi faze grupu to’o meia-finál.

Notísia Relevante: Úniku Golu Husi Angenuku Viegas Lori Emmanuel F.C Hakat Ba Finál Taça da Liga

Prezidente komisaun Organizadora Taça da Liga no atuál Diretor kompetisaun João Campos hatete, ba jogadór  mellor markadór sei hetan premium karreta Suzuki Alto ne’ebé sei oferese husi  patrosinadór kompañia Salimagu ho Metrolink.

“Tuir dadus ne’ebé mak ami rejista, jogadór ne’ebé mak agora lidera hela klasifikasaun ba markadór nian mak jogadór husi Porto Taibessi ho númeru kamizola 9 naran Jardiel Piedade, no iha regulamentu sita ona kona-bá prémiu ba rekoñesimentu jogadór nian, no prémiu sira ne’e mak hanesan, ba mellor markadór ho nia responsabilidade husi kompañia Salimagu ho Metrolink, sira sei oferese kareta ida ho marka Suzuki Alto,” Prezidente Komisaun Organizadora Taça da Liga, João Campos ba Rafa.tl iha Estádiu Munisipál Díli, Sábadu (21/02/2026).

Diretór Kompetisaun ne’e hatutan, iha tabela Top-Skor, além de jogadór Jardiel Piedade, iha mós jogadór sira seluk husi klubu Karketu Díli F.C, Alexander Corsino ho golu haat.

“Jogadór ne’ebé mak iha segundu tabela, mak jogadór husi Lica-Lica Lemorai F.C maibé elimina ona tanba Lica-Lica Lemorai F.C la pasa ba faze meiu-finál, entaun sei iha jogadór ida husi Karketu Díli F.C, Alexandre Corsino ho númeru kamizola 10 ho golu-haat, ne’ebé okupa hela iha tabela klasifikasaun,  ita espera katak jogu tuir mai, bele iha mudansa ka nafatin iha Jardiel nia kontrolu,” João Campos hateten.

Golu neen (6) husi jogadór Jardiel Piedade produz iha faze grupu bainhira F.C Porto Taibessi hasoru Fitun Estudante Lorosa’e F.C iha jogu ikus grupu C, no ida hatama ba rede Emmanuel F.C iha leg dahuluk meiu-Finál.

Golu haat husi jogadór Karketu Díli F.C, Alexandre Corsino marka iha faze grupu bainhira joga hasoru Santa Cruz F.C.

Maske lidera Top-Skor provizóriu, maibé Jardiel Piedade laiha ona oportunidade aumenta golu, tanba nia ekipa F.C Porto Taibessi elemina ona husi Taça da Liga FFTL hafoin derota ho Emmanuel F.C iha leg segundu ho skor 1-0.

Jogadór Karketu Díli F.C, Alexander Corsino sei iha oportunidade hodi marka golu, tanba nia ekipa sei joga iha jogu kontinuasaun hasoru Assalam F.C iha faze meiu-Finál Taça da Liga FFTL.

Reportajen ekipa Rafa.tl